غورځنګ
افغان ولس چې په دې وروستيو کې تقريباً د ټولې اسلامي نړۍ اتلان بلل کېږي. او دا چې په ټول عالم اسلام کې تقريباً له سوونو کلونو راپدې خوا د اسلامي نظام، خلافت او امارت نوم او نښان نشته او نږدې ټول مسلمانان اوس يوازې له دغه نوم سره اشنا دي، دغه نوم هم مسلمانانو ته د دوی د غيورو اسلافو له برکته ورپاتې دی.
خو د مسلمانانو پر همدې تورتم دوره کې الله ج د افغانانو په لاسونو باندې د ډېرې لنډې مودې لپاره په افغانستان کې دغه د اسلامي نظام تنده ماته کړه او الله ج د طالبانو د مؤسس (ملا محمد عمر مجاهد رحمه الله ) په سپېڅليو لاسونو باندې په ګران هېواد کې که څه هم د ډېرې لنډې مودې لپاره و؛ قائم کړ.
خو دا چې کفري نړۍ تل مسلمانانو ته د اسلامي نظام د راتګ پر وړاندې خورا زيات خنډونه ايجادوي نو په همدې شکل يې د افغانستان د هغه وخت اسلامي نظام (اسلامي امارت) ته هم ورته خنډونه ايجادول او په بې هوده بهانو يې پرې بلاآخره حمله هم وکړه. او د افغانانو دغه اسلامي نظام يې ورړنګ کړ.
تاريخ دا ثابته کړې ده چې د افغانستان برخليک او سرنوشت بايد سپېڅلي خلک وټاکي، او هغه خلک چې په هېواد کې ستر شوي وي، او په هېواد کې يې خاپوړې کړي وي، اسلامي ټولو عقائدو او شعائرو ته بشپړ وفادار وي، هغه بايد د ولس سرنوشت او برخليک وټاکي، د دغسې خلکو بېلګې په افغانستان کې بيخي بېشماره دي.
خو له بده مرغه بايد ووایو چې په دې وروستيو کې کله چې امريکا پر افغانستان باندې خپل شوم يرغل تر سره کړی دی، له هماغه پیل څخه يې د هېواد دغه سپېڅلی برخليک خپلو داسې تالي څټو ته سپارلی دی، چې يا خو بلکل په غرب کې رالوی شوي دي او يا هم که په اسلامي سيمو کې هم رالوی شوي دي خو د غرب تر سيوري لاندې رالوی شوي دي. چې تر ټولو لومړی او غوره مثال يې د کابل د غلامې ادارې پخوانی واکمن (کرزی ) و، چې د امريکا تر مستقيم اغېز او سيوري لاندې يې د اسلامي نظام پر خلاف لارښوونې تر لاسه کولې او له شمال ټلوالې سره يو ځای او د هغوی په ملتيا د اسلامي نظام د مجاهدينو پر وړاندې جنګېده.
دغه شان اوسنی مشر خو لا هغه د مطيع الله تراب صېب خبره ډيموکراسۍ او غلامۍ نه هم څو قدمه مخکې او وړاندې تللی دی.
په خپلو ويناوو کې هر وخت په ډېر افتخار سره وايي چې ګواکې د ده د واکمنۍ په لنډه پنځه کلنه موده کې تقريباً پنځوس زره خوا او شا عسکر د امریکا د دفاع لپاره وژل شوي دي. چې دا پخپل پر ده د غلامۍ تر ټولوڅرګند ثبوت دی.
پخپلو خبرو کې دغه تالي څټی غلام وايي چې موږ د امریکا د جنګ لپاره په لومړۍ کرښه کې موقعيت لرو او د جنګ لومړۍ کرښه د امریکا د ګټو لپاره ساتو.
د افغانستان جنګ چې امريکا په لومړي سر کې په ډېر غرور سره پيل کړی دی، اوس امريکا او ټول غرب ورته حيران دی او د دې جنګ د خاتمې لاره ورڅخه ورکه ده. خو د امریکا دغه تالي څټی بيا اوتې او بوتې وايي ته به وايې چې د جنګ په اوله کرښه کې يې زوی او کورنۍ جنګېږي.
دې ته خو نه ګوري چې په جنګ کې اکثره ځوانه طبقه مري، او اکثريت ځوانان په بې هوده جنګ او تپل شوي جنګ کې مړه شول.
دا سوچ خو له دغه تالي څټي سره نشته چې اخر به دغه جنګ نورې څومره ناخوالې وزېږوي؟؟
څومره نور افغانان به د غم په ټغر کېنوي؟؟ او څومره تورسرې به کونډې کړي؟؟
خو بس يوازې د خپلې څوکۍ او واک غم ورسره دی. د واک لپاره له هر ډول مقدساتو څخه تېر دی، له هر ډول افغاني عنعناتو څخه تېر دی. بلکل کوم سرحد نه پېژني هم نه.
خو يوازې او يوازې ټاکنې او بيا په ټاکنو ورته خپل برياليتوب مهم دی.
نو په پای کې وايو چې د افغانانو هغه سپېڅلی برخليک چې ډبره يې د سلطان محمد غزنوي رحمه الله په سپېڅليو لاسونو باندې ايښودل شوې ده. او يا يې هم بنسټ او بنياد د بېټ نيکه په بزرګو لاسونو باندې ايښودل شوی دی. او په دې ملک کې د پوره اسلام د راتللو لپاره سلطان شهاب الدين غوري، سلطان غياث الدين غوري، ميرويس نيکه، شاه محمود هوتک، احمدشاه ابدالي او نورو واکمنانو خپل ټول ژوند وقف کړی و، او په اسيا کې يوازېنی هېواد و چې له دې څخه به نورو اسيايي سیمو ته خصوصاً د هند نيمې وچې ته د اسلام مبارک دين ورڅخه خپرېده.
د دغه هېواد ښېرازولو ته افغانانو خپلې وينې او د بدن غوښې ورکړلې، خو بيا يې هم سرنوشت او برخليک تالي څټي ټاکي!!
نو ډېره د افسوس وړ خبره ده چې قرباني ورته يو څوک ورکوي او سرنوشت يې بيا د غرب تالي څټي ټاکي!!
