کابل ټکی کام (یکشنبه، ۱۴ تله ، ۱۳۹۸ل)
اسلام آباد کې دطالب او امریکایي استازو تر ناستې وروسته له باګرام زندان څخه دکونړ او نیمروز لپاره دطالبانو پخوانیو والیانو په شمول ۱۱ تنه لوړ پوړي طالب زندانیان ازاد شوي.
طالبانو دیادو زندانیانو دخلاصون پخلی کړی او زیاته کړې ده چې دې زندانیانو کې کونړ لپاره د طالبانو پخوانی والي شيخ عبدالرحيم او د نیمرزو والي مولوي عبدالرشيد بلوڅ هم شامل دي.
شيخ عبدالرحيم چې څو کاله کونړ لپاره د طالبانو والي او په ختيځ کې پر نفوذه شخصيت و، دوه کاله مخکې په جلال اباد ښار کې نيول شوی و، مولوي عبدالرشيد هم په نیمروز لوړپوړی قومندان او د ياد ولايت لپاره د طالبانو والي و.
ځينو سرچينو ويلي، د بنديانو د خلاصېدو موضوع اسلام اباد کې د امریکايي پلاوي او طالبانو د استازو له ليدو وروسته پيدا شوې.
خودمعلوماتو په اساس، دبندیانو دخلاصون موضوع نوې نه ده، بلکې دامریکا او طالبانو نهه پړاوه خبرو کې دبندیانو موضوع په مکرره توګه یاده شوې ده.
یوشمېر نورې سرچینې بیا خبر ورکوي چې دیادو زندانیانو په تبادله کې طالبانو درې هندي انجينران خوشې کړي دي، دې بندیانو کې ددوو اشخاصو هویت په ډاګه شوی اود نور هویت تر دا مهاله پټ ساتل شوی دی.
