(کابل ټکی کام، ۱۳۹۸، تله ۲۲، دوشنبه)
د بادغيس- هرات پر لويه لاره د دولتي ځواکونو له لوري له موټروانانو په ناقانونه توګه پيسې اخيستل کيږي.
د لويې لارې موټرچلوونکي وايي، کومې پوستې چې د امنيت د خونديتوب لپاره جوړې شوې د لويې لارې له موټر چلوونکو په زوره پيسې اخلي او که څوک يې ورنکړي نو ځوروي، سپکې سپورې ورته کوي.
دوی وايي، که څه هم پوستې زياتې دي خو په لامان سيمه کې چې کومه پوسته ده (که ورته ووايو چې پيسې کمې واخلۍ، هغوی د پنځوس پر ځآی بيا سل کړي) زياتوي څوک ورته د پيسو کمولو هم نه شي ويلای.
موټر چلوونکي وايي، په دې اړه د ترانسپورټ له مسؤولينو سره هم خبرې کړي خو معلومه نه ده چې هغوی امنيتي مسؤولین په جريان کې اچولي که نه.
په عين حال کې د بادغيس د ولايتي شورا رئیس عبدالعزيز بیګ هم تاييدوي چې به ياده لاره له موتر چلوونکو پيسې اخيستل کيږي خو په وينا يې اوس مهال امنيتي ځواکونو ته په ټاکلي وخت تنخواه او اعاشه نه ورکول کيږي، مجبور دي چې د خپلو لګښتونو پوره کولو لپاره پر فساد لاس پورې کړي.
دا یوازې د بادغيس- هرات لويه لاره نه ده چې موټر چلوونکي يې د لويې لارې له پوليسو شکايت کوي بلکې تر دې مخکې هم پوليس، اربکيان او د امنیتي ادارو منسوبين په لویو لارو کې له موټر چلوونکو سره د بد چلند راپورونه ورکړل شوي دي.
