کابل ټکی کام (شنبه، ۲۷ تله ، ۱۳۹۸ل)
ترکیې او د سوریې کوردانو پر یوه بل تورونه پورې کړي چې په شمالي سوریه کې یې له موقت اوربند څخه سر غړونه کړې او یو پر بل یې بریدونه کړي.
کردان وايي، باید د راس العین ښاریانو وتلو لپاره یوه بشر دوستانه تګلاره چمتو شوې وای، چې په وینا یې داسې نه دي شوي.
د دوی په وینا له دغه ښاره وروستیو نښتو کې د ملکي خلکو او ټپیانو ایستل ”ناشوني شوي دي ”. بل لور ته ترکیې هم پر کردوانو تور پورې کړی چې څو ځله یې له اوربنده سره غړونه کړې ده.
د ترکیې ولسمشر رجب طیب اردوغان وايي، په سوریه کې به ‘خوندي سیمه’ له هغې پراخه وي چې امریکايي چارواکو یې خبره کړې ده.
د ښاغلي اردوغان په خبره، د سوریې په شمال کې به دا ‘خوندي سیمه’ له ۴۰۰ کیلومترو ډېره پراخه او سور به یې ۳۲ کیلومتره وي.
د ترکیې د ولسمشر دا خبرې تر هغه څو ساعته وروسته کوي چې په سیمه کې یې د پنځو ورځو اوربند هوکړه وکړه.
د دې هوکړې پر اساس کوردي ځواکونه له دې سیمې د وتلو چانس ترلاسه کوي.تېره شپه د امریکا ولسمشر ډونلډ ټرمپ او ښاغلي اردوغان د سوریې د شمال پر حالاتو ټیلیفوني خبرې وکړې.
له هغه وروسته چې د ښکېلو خواوو له خوا د اوربند د ماتولو په اړه راپورونه خپاره شول، خو ښاغلي ټرمپ وویل، د ترکیې ولسمشر ورته ویلي چې دا نښتې “کمې وې” وې او ‘پای’ ته رسېدلې دي.
کردان بیا وایي چې جګړې د رأس العین شاو خوا روانې دي چې بمي چاودنې او د درندو اسلحونو ډزې هم دواړه خواوې کوي.
ترکیې یاد عملیات وروسته ترهغه پیل کړل چې امریکایي ځواکونه له شمالي سوریې ووتل، ترکیې ددې عملیاتو هدف یوه امن سیمه رامنځته کول یاد کړل چې له نیولو وروسته به پکې زرګونه سوریایي مهاجرین مېشت کړي.
