کابل ټکی کام (سه شنبه، ۳۰ تله ، ۱۳۹۸ل)
له هغه وروسته چې امریکایي ولسمشر دسوریې له شمالي سیمو څخه خپلو سرتېرو ته دوتلو امر وکړ، د عراق پوځ وایي، یادو سرتېرو ته به خپله خاوره کې دپاتې کېدو اجازه ورنکړي.
عراقي پوځ زیاتوي، هغه امریکایي سرتېري چې له سوریې څخه وتلي دي، د دوی په خاره کې تر لنډې مودې دمې وروسته باید ووځي، ځکه چې هغوی د دوی په خاوره کې د اوسېدو جواز نه لري.
د یاد هېواد پوځ زیاتوي، امریکایي سرتېرو ته د دې لپاره د خپلې خاورې په کردستان سیمه کې د لنډې مودې دمې لپاره د اوسېدو اجازه ورکوي چې ژر له عراقه دباندې ووځي، خو هغوی د دې حق نه لري چې هلته پاتې شي.
دا په داسې حال کې ده چې د امریکا د دفاع وزیر مارک ایسپیر ویلي، له سوریې څخه به د دوی ځواکونه د عراق غربي سیمو ته ولېږدول شي، څو هلته له عراقي ځواکونو سره د داعش جنګیالو پر وړاندې مبارزه وکړي.
دعراق پوځ تر دې وړاندې هم ویلي و چې امریکایي پوځ نه داچې دهېواد په امنیت کې مرسته ورسره کړې، بلکه لا زیات مشکلات یې ورته ایجاد کړي دي؛ پکار ده چې عراق پریږدي او په ابرومندانه توګه خپل هیواد ته ستانه شي.
