کابل ټکی کام (پنجشنبه، ۲۳ لړم، ۱۳۹۸ل)
د روسیې هيواد په يوه لرې پرته سيمه کې يوه ښوونځي کې يوه زده کوونکي پر خپلو ټولګيوالو ډزې کړي چې له امله یې يو تن وژل شوی او درې نور ټپیان دي او وروسته نوموړي خپل ځان هم وژلی دی.
د آلمان خبري آژانس د روسي چارواکو په حواله خبر ورکړې چې دغه پيښه د پنجشنبې په ورځ د چين سرحد ته نژدې په يوه ښوونځي کې رامنځ ته شوې ده.
د روسيې يوې معتبرې تحقيقاتي ادارې په خپره شوې اعلاميه کې ډزې کوونکی ۱۹ کلن ځوان ښوولی شوی. خپرپاڼه کې دغه ځوان د يوه غلي او آرام زده کوونکي په توګه معرفي شوی دی.
دغې ادارې يوه ويډيو هم خپره کړې چې د پیښې ځای کې چارواکي د څيړنو پر مهال ښوول کيږي. د روسيې دولتي رسنيو د پيښې د عامل په هکله ويلي چې هغه د خپل ټوپک خوله تر هغه وروسته خپل ځان ته واړوله چې چارواکي د پيښې ځای ته ورسېدل.
