لیکوال: خیرالله شینواری
نن مو د طالبانو د سياسي کميسون له مشر او د رهبرۍ له مرستيال ملا عبدالغني برادر او ورسره پلاوي سره مجلس درلود، د طالبانو له استازو سره مو په مهمو مسائلو نتيجه خيز بحثونه کړيدي چې لنډيز يې په لاندې ډول دی.
۱. ان شاءالله د سولې د خبرو پيل به ډير ژر له همغې نقطې کېږي چېرته چې درېدلې وې، له بهرني لوري سره له توافق وروسته چې د جګړې لويه برخه پکښې ختمېږي د توافقنامې په اساس په يوه اونۍ کې دننه بين الافغاني مذاکرات پيلېږي چې اوربند به يې اساسي محتوا وي.
۲. طالبانو وعده وکړه چې جګړه کې به ملکي تلفات صفر ته را ټيټوي، د هېڅ بېګناه او بېطرفه افغان مرګ ورته روا ندی او پدې څانګه کې تر خپله وسه نهايي کوښښ کوي.
۳. دوی د ټولګټو پروژو د امنيت او خونديتوب ډاډ راکړ او اطمنان يې راکړ چې د همغږۍ په صورت کې د هېڅ پرمختايي پروژې مخه نه نيول کېږي، طالبان وايي چې همغږي شرکتونه اوس هم ددوی په ساحو کې کار کوي او راتلونکې کې هم د فعاليتونه کولای شي.
۴. طالبانو په ډاګه کړه چې نړيوالې بشري او مرستندويه موسسات دوی سره په همغږۍ کې ددوی په ساحو کې په ازادانه شکل کار او فعاليت کولای شي.
۵. دزده کړو او تحصيلاتو په اړه به خپلو نظامي قطعاتو ته سپارښتنې کوي، د روغتيا په چارو کې د کلينيکونو په جوړولو او شفاخانو په تعمير کې د پوره همکارۍ ډاډ راکړل شو.
۶. له سولې وروسته د راتلونکي نظام په اړه طالبان وايي چې له افغان جهتونو سره چې حکومت به يې هم برخه وي بحث ته اماده دي، ټول شموله نظام ته ژمن دي، انحصار نغواړي او د خلکو له غوښتنو سره د ارزښتونو په رڼا کې د يوه سوچه اسلامي نظام جوړولو ته ژمن دي.
