کابل ټکی کام (جمعه، ۲۴ لړم، ۱۳۹۸ل)
د پاکستان په جنوبي صحرايي سیمو کې د تندرونو او سختو بارانونو له امله لږ تر لږه ۲۷ تنه وژل شوي دي. د ځايي چارواکو په وينا ويره ده، چې تلفات به له دې هم لوړ وي.
د جمعې په ورځ (د ۲۰۱۹م کال د نومبر میاشتې په ۱۵مه نیټه) پاکستاني چارواکو رسنيو ته ويلي چې تر اوږدې وچکالۍ وروسته د دې هیواد د سند ايالت په ترپاکر، سانګو او شاوخوا سیمو کې د تندر لويدنې او شدیدو بارانونو له امله لږ تر لږه ۲۷ تنه وژل شوي دي او ګڼ شمېر نور ټپيان دي.
د سند صوبايي حکومت ویاند ‘سعید غني’ رسنيو سره په خبرو کې ويلي چې حکومت بیړنی حالت اعلان کړی او سیمې ته یې د ژغورنې ډلې ليږلي دي. نوموړي په خپلو خبرو کې همدا راز زیاته کړه چې تر دغې طبیعي پیښې وروسته د ماشومانو او میرمنو په ګډون سلګونه تنه په روغتون کې تر درملنې لاندې دي.
د يادونې وړ ده، چې پاکستان کې په دې وروستیو کلونو کې د شدیدو بارانونو، توپانونو او زلزلو پیښې مخ پر زیاتیدو دي، چې له امله يې د مرګ ژوبلې راپورونه هم وکړل شوي دي.
