کابل ټکى کام (جمعه، ۲۴ لړم ، ١٣٩٨ل)
روسیې دطالب او امریکایي لوریو د بندیانو احتمالي تبادله ستایلې، او پر دواړو خواوو یې غږ کړی چې دمذاکراتي بهیر بیا پیل په دې اقدام سره یقیني کړي.
د روسیې د خارجه وزارت ویانده وايي، مسکو د افغان سولې د پروسې د بیا راژوندي کېدو هرکلی کوي، او پدې برخه کې د دریوو طالب بندیانو د آزادېدو مسئله د ښه نیت او اعتماد سازۍ لپاره ګټوره ګڼي.
د روسیې د بهرنیو چارو د وزارت ویانده زیاتوي، مسکو د طالبانو او حقاني د ډلې د مشرانو آزادېدل د افغان سولې د خبرو د پرمختګ لپاره مفید بولي.
دوه ورځې وړاندې افغان ولسمشر او یوشمېر رسنیو دطالبانو دمرستیال سراج الدین حقاني ورور انس حقاني او دوه نورو برجسته طالب چارواکو له خلاصون خبر ورکړ.
خو طالبانو په دې اړه څرګندونې نه دي کړي. ځینې غیر رسمي منابع د دې تبادلې اصلي ځنډ یو فرعي اختلاف ښیي چې ډېر ژر به هوار، او دا تبادله عملي کړل شي.
