کابل ټکى کام (سه شنبه، ۲۸ لړم ، ١٣٩٨ل)
د امریکا د بهرنیو چارو وزیر مایک پمپیو د طالب او امریکایي مرکچیانو دیوې معاملې په ترڅ کې د بندیانو وروستۍ تبادله ستایلې او ویلي یې دي چې دا به افغان سولې ته لار پرانیزي.
د امریکا د بهرنیو چارو وزیر مایک پمپیو د طالبانو له دریو مشرانو سره د امریکايي پوهنتون د دوو استادانو او ۱۰ افغان سرتېرو له تبادلې وروسته هیله ښودلې ده چې دا اقدام سولې ته لا ښه لاره برابره کړي.
ښاغلي پمپیو ویلي دي چې په کابل کې د امریکايي پوهنتون استادان د امریکايي ځواکونو په مرکز کې دي او ژر به له خپلو کورنیو سره یو ځای شي.
د امریکا د بهرنیو چارو وزیر مایک پمپیو ویلي دي: “هیله لرو چې د هغوی خوشې کیدل یو بل ښه نیت څرګند کړي چې سولې او په افغانستان کې د جګړې ختمېدو ته لار پرانیزي.
“طالبانو د خپلو دریو مشرانو له پرېښودلو وروسته په یوې اعلامیې کې هیله ښودلې ده چې “دا د سولې/پخلاینې لپاره د اعتماد سازۍ او ښه نیت د لا قوي کېدو لپاره یو ښه ګام وي.”
طالبانو دا خبره هم کړې ده چې انس حقاني به د طالبانو د مذاکره کونکو په ډله کې شامل وي، دې ډلې پدې هکله دقطر هیواد دهلو ځلو او تسهیلاتو برابرولوڅخه هم مننه کړې.
