(کابل ټکی کام، ۱۳۹۸ ليندۍ ۲، شنبه)
د هلمند ولايت په ګرشک ولسوالۍ کې په یوه پوسته کې عسکرو د خپلې پوستې دوه تنه پوليس ملګري وژلي او خپله د طالبانو ليکو ته ورغلي دي.
پېښه تيره شپه د يادې ولسوالۍ مربوط په سنګین دوراهي سيمه کې په يوه پوسته کې رامنځته شوې ده.
د دغه برید مسؤوليت طالبانو منلی ویاند يې قاري يوسف احمدي په خپله رسمي ټويټرپاڼه لیکي، برید د دوی د دوو تنو نفوذي کسانو له خوا شوی چې په پوليسو کې لا له وړاندې ځای پرځای شوي و.
د ښاغلي احمدي په وينا، له بريد وروسته دواړه بريدګر کسان د دوی لیکو ته ورستانه شوي او له ځان سره يې پنځه ميله وسلې هم طالبانو ته وروړي دي.
دا په داسې حال کې ده، چې تازه د افغانستان لپاره د امریکايي مرستو د څار ادارې سيګار په يوه راپور کې ويلي چې په وروستيو کې د افغان پوځ په لیکو کې په داخلي بريدونو کې دوه سلنه زياتوالی راغلی دی.
د سيګار راپور زياتوي، یوازې د روان کال په جون او اګست مياشتو کې د افغان پوځ په ليکو کې دیرش (۳۰) داخلي بريدونه شوي دي.
طالبانو په خپلو اعلاميو کې ويلي، چې د دولتي ځواکونو په لیکو کې يې لسګونه نفوذي کسان ځای پرځای کړي او له موقع په استفاده به پر بهرنيو او دولتي ځواکونو او چارواکو بریدونه کوي.
