(کابل ټکی کام، ۱۳۹۸ ليندۍ ۲، شنبه)
په پاکستان کې د سي پېک پروژې په اړه د امریکا او چين تازه ناندرې پيل شوي چې امریکا يې د پاکستان په زيان او چين وايي، چې یادې پروژې سره به د پاکستان اقتصاد وده وکړي.
پرون د امریکا د بهرنيو چارو وزارت مرستيالې ايليس وېلز وويل، چين په نړۍ کې د پور ورکولو تر ټولو ستر هيواد دی خو د پور شرایط نه په ډاګه کوي په وينا يې پاکستانيان غواړي په سي پېک کې د چين د پانګونې په اړه پوښتنې راپورته کړي.
ايليس وايي، د پاکستان اقتصاد به هغه وخت لا ډير زيانمن شي چې له څلورو تر شپږ کلونو بايد پور پرې کړي او که دغه پور څومره ځنډيږي په هماغه اندازه به يې پر اقتصاد بوج زياتيږي او تاوان به ورته ورسيږي.
خو په پاکستان کې د چين سفير یاوجينګ د ايليس ويلز یادو څرګندونو ته په غبرګون کې ويلي، چې چين تل په سخت وخت کې د پاکستان مرسته کړې او راتلونکي کې به هم په بد وخت کې له پاکستانه د دغه پور غوښتنه ونه کړي.
د چين سفير وايي، پاکستا چې پر ۲۰۱۳م کال کې د انرژۍ له سخت بحران سره و او چين ورته لمريزه برېښنا جوړوله، هغه وخت امریکا او امريکايي کمپنۍ چيرته وې چې دغه برېښنا يې جوړه کړې وای په خبره يې امریکا ولې پاکستان سره خپلې مرستې د سياسي غوښتنو پر اساس وځنډولې.
سي پيک اقتصادي پروژه د پخواني لومړي وزير نوازشريف د دورې پر مهال په پاکستان کې پيل شوې چې چين پرې ۵۳ ميليارده ډالره پانګونه کړې او د نړۍ پر کچه ستره اقتصادي پروژه بلل کيږي.
چين او پاکستان هيله لري چې د دغه پروژې سره به د دواړو هيوادونو اقتصاد پياوړی او لکونه پاکستانيانو ته د کار زمينه برابره شي.
تر دې مخکې هم امریکايي چارواکو پر سي پېک پروژې نيوکې کړي او دا يې د امریکايي ګټو خلاف بللې ده.
