د افغانستان کې د انګرېزي یرغل ماتې د سلمې کليزې په وياړ “مفتون”
“مفتون”
تورو تيارو ته روڼ سهر يمه تاريخ وګوره
زه د تاريخ د اسمان لمر يمه تاريخ وګوره
د شيطاني لښکرو زور او فَرېب مات نه کړمه
کلک د ايمان او غيرت غر يمه تاريخ وګوره
په سد کوم هره صدۍ کې هر بې سده انسان
د لېوني جهان ډاکتر يمه تاريخ وګوره
هره پېړۍ کې پړمخ ولمه د وخت پاړوګر
زه له منتره بالاتر يمه تاريخ وګوره
افغانستان يم چې راځې په احترام به راځې
زه ادېره د يرغلګر يمه تاريخ وګوره
په مرګ کې ژوند وينم په جنګ کې مې جانان وينمه
د حق په سر کې تېر له سر يمه تاريخ وګوره
ظالم ته اور شمه چې غاړه ورکړم ویې سېزم
مظلوم ته خوږ لکه شکر يمه تاريخ وګوره
د وخت سرزوري مې سرماتي او سرټيټ ولېږل
حق پرست ځواک يم زورور يمه تاريخ وګوره
چې باچاهي مې ملنګي کړه د مېلمه په خاطر
ګوره! ملا محمدعمر يمه تاريخ وګوره
لکه يوسف اوس راته کاندي باچاهان سلامي
هغه ورک شوى برادر يمه تاريخ وګوره
زما په شتون د دې بې خونده نړۍ خوند جوړ دى
مفتونه دومره خوندور يمه تاريخ وګوره
