(کابل ټکی کام، ۱۳۹۸ ليندۍ ۳، يکشنبه)
د بغلان ولايت په پلخمري ولسوالۍ کې دوه ديرش تنو عسکرو خپلې وسلې پر ځمکه ايښي او طالبانو سره يوځای شوي دي.
طالب وياند ذبیح الله مجاهد په خپله رسمي ټويټرپاڼه لیکي، دغه ۳۲ تنه عسکر او پوليس د یادې ولسوالۍ په مربوطاتو کې له خپلو دندو لاس په سر او طالبانو سره يوځای شول.
د ښاغلي مجاهد په وينا يادو عسکرو د سيمې مشرانو په مرسته خپلې دندې خوشې کړي زياتوي: “د بغلان ولایت پلخمري ولسوالۍ په مربوطاتو کې د کابل ادارې ۳۲ تنه عسکر او پولیس د حقائقو په درک کولو او د سیمې د مشرانو په مرسته له خپلو دندو لاس په سر او له مجاهدینو سره یوځای شول. د دعوت او ارشاد مسئولینو یې هرکلی وکړ او خپل ژوند ته یې سوق کړل”.
طالبان د تسليميدونکو عسکرو، پوليسو، دولتي منسوبينو او چارواکو لپاره د دعوت و ارشاد په نوم ځانګړی کمېسيون لري چې وخت ناوخت د هغوی په هڅو او زيار عسکر خپلې دندې خوشې کوي او خپل عادي ژوند ته ورګرځي.
