طالبانو په کندز ښار کې پوسته نيولې، اته عسکر وژل شوي
(کابل ټکی کام، ۱۳۹۸ ليندۍ ۵، سه شنبه)
په کندز ښار کې طالبانو د دولتي ځواکونو پر یوه پوسته برید کړی چې ښکيلې غاړې یوبل ته د تلفاتو اړولو ادعا کوي.
د کندز امنيه قوماندان عبدالرشيد بشير وايي، کندز ښار کې د طالبانو او دولتي ځواکونو نښته کې شپږو پوليسو پنځلس طالبانو ته مرګ ژوبله اوښتې ده.
خو طالب وياند ذبیح الله مجاهد په خپله رسمي ټویټرپاڼه لیکي، د ښار مربوط قهوه خانه سیمه کې طالبانو یوه پوسته نيولې زياتوي د جګړې پر مهال اته عسکر وژل شوي او ګڼ شمير نور ټپيان شوي دي.
د ښاغلي مجاهد په وينا، د جګړې په پایله کې د يادې پوستې څخه یوه اندازه وسلې او مهمات هم د طالبانو لاسته ورغلي خو خپل لوري ته د اوښتو تلفاتو په اړه يې معلومات نه دي ورکړي.
د جګړې ځای ته نږدې سرچينې وايي، طالبانو د شپې له خوا پوسته ونيوله، پوليسو ته مرګ ژوبله اوښتې چې د وژل شويو عسکرو جسدونه تر سهاره په پوسته کې پاتې و.
کندز ښار څو ځلې طالبانو نیولې خو د ګډو ځواکونو له خوا پر ملکي ميشت ځايونو د بمبار او بریدونو له ويرې يې بيرته خوشې کړی دی.
دا مهال د کندز پر اتیا سلنه خاوره طالبان حاکمیت لري چې د ښار اړوند ځینې سيمې يې هم تر ولکې لاندې دي او وخت ناوخت پر دولتي پوستو، نظامي کاروانونو او پوځي تأسيساتو بريدونه کوي چې عسکرو ته پکې مرګ ژوبله اوړي.
