ډاکټر یوسف اکبري
ولسمشر اشرف غنی په مکرر ډول له ملت سره ژمنه کړې وه چې بیا به معاصره وحشي صفر ۲ قطعه ماوراء محکمه صحرایي محکمې او وحشیانه وژنې نه کوي، خو د ولسمشر غني له دغه ډول ژمنې لا ډېر وخت نه ؤ تېر چې یوځل بیا یې په ننګرهار کښې دا پېښه تکرار کړه، اوس ملت نه پوهیږي چې دا وحشیانه عملیات د چا په امر اجراء کیږي؟؟؟ دا اصلاً پر ملت ملنډې وهل کیږي.
د صفر ۲ قطعې عملیات د ملت کلک غبرګون سره مخ شوي او د ملت او حکومت تر منځ ورځ په ورځ فاصله په زیاتېدو ده، د حکومت د ناعاقبت اندیشه کړنو له امله خدای خبر چې د دې مظلوم ملت برخلیک به په کوم لوري روان وي؟ او يا به هم د دې ملت ائينده څنګه وي؟؟
کمونستو حکومتونو خلک په دې اند ژوندي تر خاورو لاندې کول چې د کمونیزم تنفیذ مخې ته یې څه خنډ پاتې نشي، خو ملت هغه ظلمونه برداشت نکړل او خطرناک عکس العمل یې وښود او مات يې کړل خو د ۱۳۵۷ په نسبت نن سبا حالات ډیر خطرناک دي، د وطن ۶۵ سلنه برخه د حکومت مخالف مذهبي قوتونو تر کنترول لاندې ده او د صفر یک او ۲ وحشیانه عملیات د ګټې په ځای تاوان پېښوي، يعنې د دې پر ځای چې طالبان وځپي د حکومت پر خلاف ولس راپاروي، ولس وژنه کوي، موږ د وطن او ملت خیر په دې کښې وینو چې پر ملت ملنډو وهلو څخه لاس واخیستل شي او ولسمشر غني بايد له دا ډول بې عمله ژمنو څخه په ائنده کې تېر شي داسې څه ونه وايي چې بيا يې په عملي کولو وس نه رسېږي. ځکه چې د صفر يک، دو او نورو قطعو ټول واک له سي ای اې سره دی نو ولسمشر غني به څنګه ده قطعې اداره کړي؟؟
خو ولسمشر غني او ورسره نور حاکم ټيم، امريکايان او ناټويان دې بايد په دې پوه شي چې د ملت حوصله نوره تر مورګو شوې ده، که چېرته دغه ډول وحشيانه چاپې او وحشتونه پرې ونه درول شي نو لرې نه ده چې افغان ملت يو ځل بيا د تېر په څېر يو خونړی پاڅون وکړي او حکومت داسې نسکور کړي لکه څنګه يې چې کمونستان رانسکور کړل.
نو ځکه خو بايد څلویښت کلن جنګ ځپلي ملت باندې نور د ترحم او انصاف نه کار واخیستل شي کنه نو د ملي پاڅون انفجار شیبو ته دې منتظر اوسي.
