کابل ټکی کام (شنبه، ۲۳ ليندۍ، ۱۳۹۸ل)
نن شنبه(۱۴دیسمبر) د پاکستان لومړی وزير عمران خان په يوه ورځني رسمي سفر سعودي عربستان ته تللی دی، د پاکستان راډيو تلويزون وايي، نوموړی به د سعودي له پاچا سلمان بن عبدالعزیز، وليعهد محمد بن سلمان او نورو چارواکو سره د دواړو هيوادونو پر اړيکو او د سیمې پر امنيت خبرې وکړي.
د نړیوالو چارو څارونکي د دې سفر لامل د ماليزيا پلازمېنه کولالمپور کې د ترکيې، پاکستان، قطر او ماليزيا ګډ کنفرانس په اړه د سعودي د خفګان لرې کول ښوولي دي.
د ماليزيا لومړي وزير مهاتير محمد د ترکيې، قطر، ایران او د پاکستان مشرانو ته ماليزیا کې يوې ګډې غونډې ته بللي او يو نوي اتحاد جوړېدو خبر یې ورکړی و؛ خو له دې امله چې سعودي او متحده عربي امارات دې کار ته د اسلامي همکاريو د سازمان د بديل په سترګه ګوي، د دې غونډې مخالفت یې کړی دی.
د ماليزيا حکومت وايي، دغه ناسته به د روان ديسمبر له ۱۸مې تر ۲۰ نېټې په پلازمېنې کولالمپور کې جوړه شي.
که څه هم د پاکستان د بهرنيو چارو وزارت ويلي، د کولالمپور راتلونکې ناسته کې به د اسلامي امت پر وړاندې د شته ګواښونو په اړه خبرو لپاره ګډون وکړي؛ خو د پاکستان حکومت لپاره د سعودي سره د ښو اړيکو پالل هم ضروري دی.
