سوریه: تازه جګړو کې لسګونه تنه وژل شوي
کابل ټکی کام (شنبه، ۲۳ ليندۍ، ۱۳۹۸ل)
د سوریې په ادلب ولایت کې د انقلابیانو او د دولتي ځواکونو ترمنځ سختې جګړې ترسره شوي چې په پايله کې يې لسګونه تنه وژل شوي دي.
د سوریې د بشري حقونو بنسټ وايي، ددې ولایت په جنوب ختيځو سیمو کې د دواړو لوریو ترمنځ د تماس پر کرښو خونړۍ له پرون راهيسې جګړې روانې وې چې له درندو وسلو هم پکې کار اخيستل شوی دی.
دغو جګړو کې د انقلابیانو او ددولتي ځواکونو ۳۵ تنه وژل شوي او ګڼ شمير نور ژوبل شوي دي.
د ياد بنسټ په وينا، دانقلابیانو “تحریر الشام” ډلې د دولتي ځواکونو د پرمختګ مخه نيولې ده.
په ورته مهال نامعلومو وسله والو د پلازمينې دمشق د دوما په سيمه کې د دسوريې ددولتي ځواکونو په یوه پوسته برید کړی چې د مرګ ژوبلې راپور یې نه دی ورکړل شوی.
د يادونې وړ ده چې له دوما ولايت څخه د انقلابیانو له وتلو وروسته دا لومړی برید دی چې ياده سیمه کې ترسره کیږي.
