کابل ټکی کام (سه شنبه، ۲۶ ليندۍ، ۱۳۹۸ل)
د پخواني شوروي اتحاد وروستي ولسمشر ‘میخایل ګورباچوف’ په تازه مرکه کې ويلي، چې امریکا پر ټولې نړۍ د نظامي تسلط په هڅه کې ده او له همدې امله د اټومي وسلو له نړیوالو معاهدو څخه د ځان ايستلو کوښښ کوي.
ګورباچوف د ‘ټاس’ خبري اژانس سره په مرکه کې ویلي، چې امریکا د نړۍ په کچه شر خوښی هېواد دی؛ خو دده په وينا له نیکه مرغه چې اوسنۍ نړۍ کې هغه څه ناممکن دي چې امریکا یې په لټه کې ده.
د نوموړي په خبره اوسنۍ نړۍ د دوه اړخیز درناوي پر بنسټ خپل روابط جوړوي او دا لامل دی چې امریکا به هیڅکله دې ناوړه ارمان ته ونه رسېږي.
ښاغلي ګورباچوف وويل، چې که چېرته نوره نړۍ هم د امریکا په پله قدم کيږدي او د اټومي وسلو جوړولو کې سیالي پيل کړي؛ نو ډېر ژر به نړۍ له ګډوډیو سره مخ شي.
