کابل ټکى کام (پنجشنبه، ۵ مرغومی ، ١٣٩٨ل)
د سولې د عالي شورا رئيس محمدکریم خلیلي وايي، چې د انحصار له لارې افغانستان “هیڅکله” سولې ته نشي رسېدلی او که څوک دا ملي پروسه په خپل انحصار کې راولي نو د سیاسي جریانونو له ممانعت سره به مخامخ شي.
ښاغلی خلیلي، چې په جمهوري ریاست انتخاباتو کې د عبدالله عبدالله په مشرۍ د ثبات او همپالنې ډلې ملاتړ کوي، د پنجشنبې په ورځ د ډیسمبر په ۲۶مه د “افغانستان د اسلامي وحدت ګوند” غونډې ته په وینا کې وویل، چې د امریکا او طالبانو ترمنځ د سولې د مذاکراتو له بیا پیلېدو څخه ملاتړ کوي.
خو هغه زیاته کړه چې سوله یوه دولتي پروسه نه ده او طالبان حاضر نه دي چې له اوسني دولت په ځانګړي ډول غني سره مذاکرات وکړي.
د افغانستان د سولې د عالي شورا رئیس سوله یوه ملي پروسه وبلله او وې ویل: “ارګ نشي کولی چې هغه (سوله) په خپل انحصار کې راولي او د انحصار په روحیې موږ هیڅکله سولې ته رسېدلی نشو”.
ښاغلي خلیلي په داسې حال کې دا څرګندونې کړي، چې تیره ورځ د دولت جوړونکي انتخاباتي ډلې لومړي مرستیال امرالله صالح وویل، د سولې مذاکرات دوه اړخونه لري، چې یو یې د افغانستان دولت او بل یې وسلهوال طالبان دي.
