امین وردګ
سبا (پنجشنبه) په کابل کې لویه جرګه جوړیږي، په دغې جرګه کې به د هېواد له ټولو ولایاتو څخه شاوخوا ۳۰۰۰ دری زره کسان شرکت وکړي چې زیاتره به یې دیني علماء او قومي متنفذین وي.
که څه هم چې د غونډې اجنډا لا نه ده رسینیزه شوې خو زه فکر کوم چې اسلامي امارت د داخلي مشروعیت له تر لاسه کولو وروسته غواړي چې نړۍ ته خپل ملي حمایوي موقف وښيي.
زه فکر کوم چې په یاده غونډه کې به لاندې خبرې مطرح شي.
ا – حاکم نظام (د افغانستان اسلامي امارت) غواړي خپل شرعي موقف او داخلي مشروعیت نړۍ ته وښیی.
ب – کېدای شي په غونډه کې د (امیرالمؤمنین) دروند لقب بیاځلې تائید او شرعي جنبه یې تقویت شي.
ج- د غونډې ګډونوال به ټول په متحدانه توګه د افغانستان حاکم نظام تائید کړي.
د – ټول ګډونوال به پر نړۍ غږ وکړي چې: د افغانستان حاکم نظام په رسمیت وپېژنئ.
ه- ټول ګډونوال به په ګډه اعلامیه که له امریکا څخه و غواړي چې؛ د افغانستان ګنګل شوې پیسې بېرته آزادې کړي.
و – په غونډه کې به د نجونو پر تعلُم ، تحصُل او کار هم خبرې وشي او ډېر امکان لري چې د بیا خلاصون لپاره یې مشخص کمیسیون ته (له همدغه آدرسه) دنده وسپارل شي.
ز- په غونډه کې ممکن هېواد ته ځینې نوي راغلي کسان هم ګډون وکړي او د پخواني نظام بعضې هاغه کسان به هم راوغوښتل شي چې همدلته پاتې شوي وو.
ح- د غونډې پروسه به په ریښتینې معنا سره شفافه او عادلانه وي.
ط- شاید چې په غونډه کې ځینې مېرمنې هم ګډون وکړي او دوی به په جرئت سره د فعلي نظام له پالیسۍ څخه پرېکنده ملاتړ اعلانوي.
ی- ممکن له نورې اسلامي نړۍ څخه هم ځینې مشهور دیني عالمان د مېلمنو په توګه راوغوښتل شي خو له بین المللي نسبي تحدیدونو او تحریمونو سره به مخ شي.
ک – د غونډې امنیت به د بل هر وخت په پرتله ډاډمن وي که څه هم چې مافیا به د ځینو سيمه ایزو استخباراتي کړیو په واسطه خال خال تحدیدونه رامنځته کړي اما هغه به ناچیز وي.
– په غونډه کې به پر ټولو تللو او وتلو افغانانو (خصوصاً تاجرانو، مسلکیانو او کدرونو) باندې غږ وشي چې؛ راشي او خپل هېواد ته خدمت وکړي.
زه یقین لرم چې د غونډې له عمومي غوښتنو څخه به یوه دا هم وي چې؛ حکومت باید لاپسې ټولشمول شي مګر تحدیدوونکې باغي کړۍ دې سمې وځپل شي.
د غونډې پر وړاندې به نړیوال غبرګونونه څه وي؟
– که څه هم چې له غونډې څخه به یو شمېر هېوادنه خپل (نیمه) ملاتړ وښيي اما د رسمیت پېژندلو جرئت به یې و نکړای شي.
– غربیان به یې ټول استازي د اسلامي امارت پلویان وبولي او ولسي جنبه به یې په سپینسترګۍ سره رد کړي.
– بین المللي ټولنه به هم انتقاد پرې وکړي، د بین المللي نورمونو خلاف به یې وبولي او ټولشمولیت به یې رد کړي.
– ځینې حمایوي او نفوذي ممالک به یې د اقلیتونو استازو د کمرنګۍ تورونه پورې کړي.
– دا هم امکان لري چې ځینې شیاطینې رسنۍ به یې طالباني یا طالب پلوه غونډه وبولي.
د ملت توقع:
د ملت بیخي ډېرې هیلې له راتلونکې غونډې یا جرګې سره تړلې دي، نو ځکه خو باید ټول ګډونوال مدبرانه او عاقلانه ګامونه واخلي او داسې دې فرض کړي چې؛ د ملت ټول مسؤلیت (د حال او او راتلونکي) د دوی پر غاړه دی.
موږ له الله پاک نه غواړو چې د دغې لویې غونډې په برکت مو شته ستونزې حل یا لږ تر لږه کمې کړي.
همداراز ترې غواړو چې د راتلونکي نړیوال تعامل مخې ته مو پراته خنډونه لیرې کړي.
توکلت علی الله! دا خو زما خپل اټکل ؤ؛ و به ګورو چې الله پاک څه غواړي؟
