ټاکل شوې ده چې سبا پنجشنبه د چونګاښ په ۹ مه نېټه به افغان پلازمینه کابل کې د علماوو، پوهانو او قومي مخورو یوه ستره غونډه پیل شي.
دغه غونډه چې د لویې جرګې په تالار کې به جوړیږي له ټول هیواد څخه به پکې نږدې ۳۰۰۰ کسان برخه اخلي او درې ورځې به دوام کوي.
اسلامي امارت ته نږدې سرچینې وایي، چې دغه غونډه له مشرتابه د علماوو د بیا بیا غوښتنې څخه وروسته جوړیږي، کوم دولتي فرمایش نه دی او په هغو موضوعاتو به پکې بحثونه نه کیږي چې له ډیرې مودې په رسنیو کې ښکته پورته کېږي بلکې د اسلامي امارت د ملاتړ ترڅنګ به چارواکو او مسؤلینو ته ځینې سپارښتنې او مشورې ورکوي.
خو له دې جرګې “غونډې” د عامو افغانانو څه غوښتنې دي؟
په دې هکله ځینو افغانانو “کابل ټکی کام ویب پاڼې” ته په رالیږلو پیغامونو کې د جرګې له ګډونوالو ځینې غوښتنې کړې دي.
۱- دا چې د جرګې ګډونوال باید د نجونو د تړلو ښونځیو د بیا پرانیستل کېدو په هکله جدي بحثونه وکړي او د افغانستان د “اسلامي امارت” له مشرتابه په کلکه غوښتنه وکړي چې دې مسئلې ته یوه تلپاتې حل لاره را وباسي.
۲- لکه څرنګه چې اسلام سړیو ته د زده کړو حق ورکړی دی، همداسې یې نجونو ته هم ورکړی دی اوس نو دا د حکومت دنده چې هر څنګه کړنلاره ورته جوړوي، خو ولس تعلیم غواړي باید دا حق ورکړل شي.
۳- د سرپرست حکومت په پای ته رسېدو او د يو بل نسبتا وسيع اسلامي نظام پر جوړښت او څرنګوالي بحثونه وشي.
او په دې هکله يوې نتيجې ته ورسيږي.
۴- د رسميت پېژندنې پر وړاندې د پرتو خنډونو ليرې کول او د نړيوالو اقتصادي بندیزونو پای ته رسول د ولس بله غوښتنه ده، چې بايد له ګډونوالو پرې نظر وغوښتل شي او په رڼا کې يې تصاميم ونيول شي.
۵- د نوي اساسي قانون پر جوړښت، ترتیب او تصويب بايد بحثونه وشي او يوې نتيجې ته ورسيږي.
۶- په دې هم بحثونه وشي، چې د اقتصادي پرمختګ او پراختيا په برخه کې د هيواد او نړۍ له متخصصينو څخه څرنګه ګټه پورته کېدلی شي.
#یادونه: دا چې کابل ټکی کام یوه آزاده او خپلواکه ویب پاڼه ده؛ یوازځینۍ موخه یې تر چارواکو د هیوادوالو د نظرونو رسول دي او چې متن کې څه لیکل شوي د عام ولس غوښتنې دي د کابل ټکی کام رسمي دریځ نه دی.
په درناوي
“اداره”
