کابل ټکی کام (شنبه، ۲۵ چنګاښ، ۱۴۰۱ل)
په کابل او يو شمېر ښارونو کې موټر چلوونکي وايي، چې په نړيوال بازار کې د تېلو بيې راښکته شوي، بايد په افغانستان کې هم راټيټي شي.
دوي وايي، په نړیوال بازار کې د تیلو بیې ۳۰ سلنه ټیټې شوې، خو افغانستان کې لا هم پر خپل ځای دي او هېڅ بدلون پکې نه دی راغلی.
د صنعت او سوداګرۍ خونې مسوولین وايي، چې په نړیوالو بازارونو کې د یو بیلر تیلو بیه د ۱۲۰ ډالرو څخه ۹۰ ډالرو ته راښکته شوې ده.
د سوداګرۍ خونۍ مسوولین او موټر چلوونکي وايي، چې د اوسني نرخ په اساس باید په افغانستان کې د یوه لیټر تیلو بیه ۶۰ افغانۍ وي.
د موټرو خاوندانو له چارواکو څخه د تیلو د بیو د کنټرول په برخه کې د جدي پاملرنې غوښتنه کړې ده.
کابل ښار د غزني د لين يو موټر چلوونکی احمد ګل وايي، خلک غريب دي او د زياتې کرايې وس نه لري، اوس چې په نړيوال بازار کې تېلو نرخونه ټيټ شوي، پکار ده چې تجاران هم تېل په ټیټ نرخ راوارد کړي، ترڅو خلک د کرايو د ورکړې له توان ووځي.
تردې مخکې د افغانستان د رياست الوزرا اقتصادي معاونيت ويلي و، چې د تېلو د نرخونو په لوړولو او د بحراني حالت په رامنځته کولو کې ځینې کړۍ لاس لري. معاونیت د نرخونو د راټیټولو په اړه له ټولو ممکنو لارو کار اخلي او هغه اشخاص تعقیبوي څوک چې د دې عمل ارتکاب کوي.
