کابل ټکی کام (جمعه، ۷ زمری، ۱۴۰۱ل)
د افغانستان د بهرنيو چارو وزارت وايي، چې تېر ماښام د ا. ا. ا. د بهرنیو چارو د وزیر مولوي امیر خان متقي او د چین ولسي جمهوریت د بهرنیو چارو وزیر وانګ يې ترمنځ په تاشکند کې دوه اړخیزه ناسته ترسره شوې ده.
د بهرنيو چارو وزارت مرستيال وياند حافظ ضياء احمد وايي، چې په ناسته کې د افغانستان-چین پر دوو اړخیزو اړیکو، په افغانستان کې اقتصادي او بشري وضعیت خبرې شوي دي.
نوموړي په دې اړه په خپل رسمي ټويټر اکاونټ په خپره کړې خبرپاڼه کې لوکلي، چې د غونډې په پيل کې د چین د بهرنیو چارو وزیر د افغانستان د اقتصادي او بشري وضعیت په مدیریت کې د نوي حکومت اقدامات وستایل په خبره يې:«ښاغلي وانګ يي د امنیت د تامین په برخه کې د ا. ا. د حکومت پرمختګونه د پاملرنې وړ وبلل.»
د ضياء احمد په وينا، د چين د بهرنيو چارو وزير همداراز د افغانستان او چین ترمنځ د اقتصادي بیارغونې او بشري مرستو د میکانیزمونو په چوکاټ کې د هراړخیزو مرستو او په ځانګړې توګه په سوداګریزو او کرنیزو برخو کې د مرستو یادونه وکړه تر څو د افغانستان کرنیز توکي زیات شي او اقتصادي ځانبسیاینې ته ورسېږي.
وانګ يي ټینګار وکړ چې د کوکنارو د کښت له بندولو سره چین چمتو دی چې افغان بزګرانو ته د بدیل معیشت په برخه کې مرسته وکړي.
په دې لړ کې د چین د بهرنیو چارو وزیر ژمنه وکړه چې د اګسټ له لومړۍ نېټې وروسته به افغانانو ته ویزې ورکول پیل شي.
دغه راز د ا. ا. د بهرنیو چارو وزیر د تاشکند ناسته ډېره ګټوره وبلله او په ناسته کې يې د سیمهییزو هېوادونو، په ځانګړې ډول د چین د استازي څرګندونې د افغانستان ملاتړې وبللې. ښاغلي متقي د چین له خوا له افغان زلزلهځپلو سره د پر وخت بشري مرستو مننه وکړه او هیله یې وښوده چې د دواړو هېوادونو ترمنځ د اقتصادي بیارغونې او بشري مرستو د میکانیزمونو په چوکاټ کې شوي پرمختګونه پلي شي.
ښاغلي متقي له چینايي لوري مننه وکړه چې د چین اورومچي ته یې د اریانا افغان هوايي شرکت د الوتنو زمینه برابره کړه او زیاته یې کړه چې دا چاره به د افغانستان د صادراتو له زیاتولو سره مرسته وکړي.
په پای کې د چین د بهرنیو چارو وزیر ژمنه وکړه چې دواړه لوري به په سیاسي برخه کې اړیکې لا پراخې کړي.
