کابل ټکی کام (جمعه، ۱۸ وږی، ۱۴۰۱ل)
د راپورونو له مخې د پاکستان د کراچۍ ښار په مرکزي زندان کې لا هم لسګونه افغانان بندیان دي او برخلیک یې معلوم نه دی.
د کوزې پښتونخوا په کواټ ښار کې میشت د خوږیاڼو قومي مشر “حاجي نظر” رسنیو ته ویلي، چې تر دوو سوو ډېر افغانان چې پکې ښځې ، ماشومان، سپین ږیري او ناوې هم شامل دي، دوه میاشتې مخکې د پاکستان د پولیسو لخوا نیول شوي دي.
د نوموړي په خبره دا کسان له کندهار څخه کویټې ته ددرملنې لپاره تللي وو او له هغه ځایه کراچۍ ته تلل چې په لاره کې پولیسو د اسنادو نه لرلو په تور نیولي دي.
حاجي نظر چې اوس له کوهاټ څخه کراچۍ تللی ترڅو ددغو کسانو دوسیې پرمخ بوځي وایي، دا چې پیسې نه وې، په سعودي کې یې میشتو افغانانو سره اړیکې ونیولې ، هغوی د دوی لپاره چنده راټوله کړه او په دغو پیسو یې وکیلان ونیول، چې د ځینو ضمانتونه وشول او د نورو پاتې دي.
نوموړی وایي، چې د افغانستان سفارت او کونسلګري په دې برخه کې هیڅ ډول همکاري نه ورسره کوي.
د ویلو ده چې دوه میاشتې وړاندې د کویټې او کراچۍ پر لاره د پاکستاني پولیسو لخوا د ګڼ شمېر افغانانو د نیولو خبرونه خپاره شول؛ خو څو ورځې وروسته کویټې کې د افغان کونسلګرۍ چارواکو خبر ورکړی و، چې نیول شوي کسان له زندان څخه تر خوشې کېدو وروسته افغانستان ته را انتقال شوي دي.
