معصوم یوسف جان!

لیکوال: نوراني “عزام”
د ا.ا.ا له راتګ وروسته په هېواد کې بشپړ او مثاله امنیت رامنځته شوی، چې افغان ولس له تېرو څلوېښت کلونو را پۀدېخوا په لومړي ځل د امنیتي وضعیت څخه پوره ډاډمن دي او په آرامه او هوسا توګه د ژوند چارې مخته وړي.
بلخ ولایت کې د هېواد نورو ولایتونو په څېر د جنایي پېښو ګراف صفر ته راټیټ شوی او حکومت توانېدلی، چې د ولس تر غوښتونو او هیلو څخه لوړ امنیتي تدابیر ټینګ کړي او د ولس امنیت په کُلي توګه ثابت وساتي.
دا چې بلخ ولایت د تېر نظام د حاکمیت پر مهال د جنایي پېښو پر تناسب تر ټولو نا امنه ولایت و او د غلاوو په شمول د هر ډول جنایاتو لپاره منظمې حلقې او ډلګۍ موجودې وې او سخته وه چې په لنډ وخت کې دې د دې حرفوي او ګروپي جنایتکارو مخنیوی وشي، خو لله الحمد د ا ا.ا د یو کال په تېرېدو سره د ټولو جنایي پېښو مخنیوی په بشپړه توګه شوی او داسې امنیت او عدل رامنځته شوی چې په تېرو شلو کلونو کې یې ساری نه دی لیدل شوی.
د تېرو دریو میاشتو په ترڅ کې یواځي یوه پېښه را منځته شوې، چې د پېښي د رامنځته کېدو سره سم د بلخ ولایت والي صیب، په ځانګړې هدایت او پاملرنه امنیتي او کشفي ځواکونو، شپه او ورځ هڅې پیل کړې او هره شېبه والي صاحب، امنیه قومندان، د استخباراتو مسؤلینو، پېښه تر تعقیب لاندې نیولې وه، تر څو ماشوم د انسان تښتوونکو له منګولو وژغوري او مجریمینو ته د اسلامي شریعت او قوانینو په رڼا کې جزا ورکول شي.
بلآخره د یوې اونۍ په اوږدو کې لومړی د مجرمينو څو تنه ونیول شول او ورپسې د ماشوم د ساتلو پټ ځای د نیول شوو مجرمینو له لوري وښودل شو او د امنیتي او کشفي ارګانونو له لوري ماهرانه عملیات ترسره شول چې په پایله کې یوسف جان آزاد او د انسان تښتونکو ټوله حلقه ونیول شوه.
یوسف جان خپلې کورنۍ ته د سپارلو پر مهال ویلي و، چې: انسان تښتوونکي سخت په وېره کې و او هر ځل به یې ویل چې امنیتي ځواکونه ممکن اوس راشي او موږ ونیسي موږ باید ژر تر ژره ستا له پلار څخه پیسې واخلو او تا آزاد کړو، تر څو زموږ ځای معلوم نشي او هم ونه پېژندل شو.
زړورو امنیتي او کشفي ارګانونو په دوه دریو ورځو کې د تښتوونکو ټول معلومات وکړل او یو په بل پسې یې تښوونکي ونیول او بلآخره د خپلو هڅو په دوام یې د انسان تښتوونکو تر کور او پټنځای ځانونه ورسول.
دا چې بلخ اوس د عدل او امنیت په کور بدل شوی او د دې خاورې اصلي مالکین یې حکومتي چارې اداره کوي او د خپل ولس او خلکو لپاره داسې خدمت کوي چې په تېر کې یې هېڅ ساری نه دی لیدل شوی، د خوښۍ او ویاړ ځای دی او زموږ ولس یې باید نور هم ملاتړ وکړي او په ټولو چارو او خدماتو کې ورسره مرسته وکړي.
له نېکه مرغه بلخ او د هېواد په ټولو ولایتونو او سیمو کې ولس لکه څرنګه چې د اشغال پرمهال د خپلو مجاهدینو تر څنګ ودرید او په خپلو امکاناتو یې د مجاهدینو ملاتړ او مرسته وکړه، د امنیت په ښه ټینګېدو کې هم له خپلو مجاهدینو سره اوږه په اوږه ولاړ دی او جنایت کارانو ته د فعالیت اجازه نه ورکوی. همدا لامل دی، چې د هر ډول جنایي پېښو عاملیم په لنډه موده کې نیول کېږي او قانون ته سپارل کېږي.
پای