کابل ټکی کام (پنجشنبه، ۱۴ تله، ۱۴۰۱ل)
په داسې حال کې چې اوکرایني ځواکونو د روسیې لخوا د اوکراین ګڼې اشغال شوې بېرته نیولې مسکو واشنګټن ته خبرداری ورکړی، چې که د اوکراین په جګړه کې له پاروونکو اقدماتو لاس وانخلي نو له بدو پایلو سره به مخ شي.
واشنګټن کې د روسیې سفیر “اناتولي انتونوف” ویلې، چې له اوکراین سره د پوځي مرستو دوام د روسیې او لويدیځ تر منځ د مخامخ جګړې ګواښ زیاتوي.
دا په داسې حال کې ده چې د روسیې دفاع وزارت ویلي، چې د اوکراین د پلازمینې کېیف په ګډون یې د یاد هېواد په ګڼو ښارونو کې یو شمېر پوځي اهداف په نښه او له مینځه وړي دي.
باید وویل شي چې د روسیې لخوا پر اوکراین تر برید وروسته لویدیځ په ځانګړي ډول امریکا اوکرایني پوځیانو ته د لسګونو میلیارده ډالرو په ارزښت ډول ډول وسلې ورکړې چې له امله یې اوکرایني ځواکونو د روسانو د یرغل مخه ونیوله او ګڼې اشغال شوې سیمې یې بېرته د اوکراین برخه وګرځولې.
