نن د افغانستان او چین تر منځ اقتصادي هوايي دهلېز بېرته فعال او ۲۰ ټنه جلغوزي چین ته واستول شول
کابل ټکی کام (دوشنبه، ۱۸تله، ۱۴۰۱ل)
چارواکي وايي، تر لس مياشتني ځنډ وروسته نن ۲۰ ټُنه جلغوزي د هوايي دهلېز له لارې چين ته واستول شول.
چین ته د هوايي دهلېز له لارې د بیا صادراتو پيل پرانیستغونډه کې د رئيس الوزرا اقتصادي مرستيال ملا عبدالغني برادر وويل، چې چین ته د هوايي دهلېز له لارې به د افغانستان او چین تر منځ سوداګریزې اړیکې پياوړې او د جلغوزو صادرات به د پام وړ وده وکړي.
ښاغلي برادر زياته کړه: «هوايي دهلېزونه د افغانستان په شان په وچه کې راګیر هېواد ته یوازینۍ لاره ده، چې خپل مالونه بې له کوم خنډ د نړۍ مارکېټونو ته ورسوي.»
د برادر په وينا، څو ورځې مخکې افغانستان د ځمکې له لارې د ازبکستان او قرغیزستان له طریقه، له چین هېواد سره وصل شو او د افغان تجارانو لپاره فرصت برابر شو،څو د چین مارکېټونو ته اسانه لاسرسی ولري.
ملابرادر وويل، چې د افغانستان اسلامي امارت هڅه کوي، چې د افغانستان هوايي دهلېزونو ته وسعت ورکړي؛ ترڅو وکولای شو د چین ترڅنګ ترکیې، اروپا، هند او عربي هېوادونو ته هم صادرات ولرو.
برادر زياته کړه«په نږدې راتلونکي کې به پر ترکیې سربېره د ډېری هېوادونو هوايي شرکتونه افغانستان ته پروازونه پيل کړي.»
