کابل ټکی کام(چهارشنبه، ۲۵ لړم، ۱۴۰۱ل)
د افغاني سرې مياشتې ټولنه وايي، چې له المان څخه هغه ۶۸ افغان ماشومان بېرته راستانه شول چې څه موده مخکې د تداوۍ لپاره لېږل شوي و.
د سرې مياشتې ټولنې وياند ښاغلی عرفان الله «شرفزوی» وايي، «المان هېواد ته د افغاني سرې میاشتې له لوري ۶ میاشتې وړاندې ۶۸ لېږل شوي هغه ناروغ ماشومان بېرته هېواد ته راوړل شول، چې د ماتو هډوکو او سوځېدلي بدن د درملنې په موخه ياد هېواد ته لېږل شوي وو».
د نوموړي په وينا، په همدغه الوتکه کې تېره ورځ ۵۴ نور په یادو ناروغیو اخته ماشومان المان ته ولېږل شول.
ګلاغا چې د لوګر ولايت د محمداغې ولسوالۍ اوسېدونکی دی وايي، زوی يې د سرې مياشتې له لوري جرمني ته استول شوی و چې تر تداوۍ وروسته بېرته روغ راستون شوی.
يوبل تن صالح خان چې د ميدان وردګ د بهسودو ولسوالۍ اوسېدونکی دی وايي، د زوی خپه يې سوزيدلې وه چې د سرې مياشتې په همکارۍ جرمني هېواد ته ولېږل شو او هلته تر تداوۍ وروسته يې بيرته ورته زوي روغ او سلامت سپارلی دی.
د افغاني سرې مياشتې ټولنه وخت ناوخت المان هېواد ته په اور سوځېدلي او په خپو او لاسونو شل کوچنيان لېږي چې هلته يې تر تداوۍ وروسته بېرته هېواد ته راولي او خپلو کورنيو ته يې سپاري.
