کابل ټکی کام(دوشنبه، ۳۰ لړم، ۱۴۰۱ل)
د راپورونو له مخې، د افغانستان د بهرنیو چارو وزیر مولوي امیرخان متقي او د افغانستان لپاره د ناروې شارژدافیر پال کلومان بکر په کابل کې سره ليده کاته کړي او د بشري مرستو، امنیت، انکشافي همکاریو او يو لړ سياسي موضوعاتو په هکله یې خبرې کړي دي.
بکر ويلي؛ هیواد یې د تل په څیر اوس هم له افغانستان سره اوږدمهاله اړيکو ته تیار دی او هڅې کوي چي د افغانانو لاسنیوی وکړي.
شارژدافیر بکر په افغانستان کې د تېر په پرتله د ښه امنیت تائيد وکړ او زياته يې کړه چې اوس بشري مرستې تر لیري پرتو سیمو رسيږي.
همداراز نوموړي څرګنده کړه چې هیواد یې له افغانستان سره د تعامل په پار نوي ډیپلوماټان معرفي کړي، چې د اړیکو په ساتلو کې به مثبت رول ترسره کړي.
ښاغلي متقي وویل، باید کوشش وکړو نړۍ او افغانستان له یو بل سره نږدې کړو، د نوي افغان حکومت مثبت اقدامات باید وستایل شي، مثبت ځواب ورکول شي زياته يې کړه:«تخریبوونکې ډلې مو ځپلې او هیچاته اجازه نه ورکوو چې د افغانستان له خاورې څوک وګواښي. دغه راز مو د مخدره توکو کښت او قاچاق بند کړي او لسګونه زره په نشو روږدي کسان تر درملنې لاندې دي.»
د ښاغلي متقي په وينا، نړۍ مسؤلیت لري چې په دې برخو کې مرستې وکړي او دغه ډول بشري موضوعات سیاسي نکړي.
