روح الله ريحان
څو شيبې وروسته په قطر کې د فوټبال نړيوال جام پېليږي. دغه جام شاوخوا يوه مياشت دوام کوي، چې ۳۲ ټيمونه به ۶۴ لوبې وکړي.
ددې جام پرانيسته به د قران کريم په تلاوت وشي چې وروسته به د يو لړ مراسمو سره نړيوال مشهور داعي ډاکتر ذاکر نايک هم وينا وکړي. ويل کيږي چې هغه به د نړيوال جام پرمهال بېلا بېلو وختونو کې خلکو سره بحثونه کوي. ددې سربېره له يو شمېر هېوادونو څخه دغه هېواد ته علماء او داعيان رسېدلي چې د خلکو ترمنځ به د اسلام اخلاق بيانوي.
که وګورئ په ځانګړې توګه په لويديځو رسنيو د سر ټکی د قطر ۲۲۰ ډالر مليارده مصارف دي، البته هغه ګټه چې په معنوي لحاظ قطر اسلام ته له دې جام څخه پورته کوي څوک پرې نه غږيږي.
قطر پر فوټبال ټول دغه خرڅ نه دی کړی، بلکې د راتلونکي اوږدمهال لپاره يې مصارف کړي دي. سرکونه جوړول، ميټرو بس ته جلا لارې او نور بېلا بېل مرکزونه پرانېستل يې ددې ويژن برخه ده.
مثبت اړخونه يې څه دي؟
يو مشهور قطري عالم وايي، تر کومه چې قطر ته د فوټبال مينوال راروان دي، يوازې يې په تېره يوه اونۍ کې نږدې ۶ سوه کسان مسلمانان شوي. مسلمانېدل يې پرځای، د قطر له دې مثبتو کارونو څخه يوازې د اروپايانو او امريکايانو ترمنځ د اسلام په اړه مثبت تاثر اخيستل ستره لاسته راوړنه ده چې ډير مسلمان هېوادونه يې نشي کولی.
ددې سربېره پر هغو لارو او کوڅو چې د فوټبال مينوال پرې تيريږي نبوي احاديث په عربي او انګليسي ژبه ځړولې دي. تر ډيره دغه احاديث په دين کې اسانتيا رامنځته کول، د خلکو سره ښه تعامل کول، د خير کارونه کول، نورو ته خير رسول او د ترهګرۍ په اړه ددوی فکر بدلولو اړوند دي.
دغه راز ويل کيږي چې د عربب، د اسلام تاريخ او اسلامي کيسو اړوند په ۱۶ ژبو ژباړل شوي کتابونه يې د فوټبال پر لوړپوړو چارواکو ويشلي دي.
همدارنګه له مسجدونو څخه يې ټول هغه مؤذنين چې اوازونه يې ښه نه وو لرې کړي، پر ځای يې د ښکلي غږ مؤذنين ټاکلي، او لوبغالو کې يې لوډسپيکرونه لګولي تر څو ددې حلاوت د نړيوالو غوږونو ته ورسيږي.
ددې سربېره يې د ټولنې د پاکۍ لپاره لوبغالي ته د هغو انجونو او ښځو د تګ مخنيوی کړی چې لنډې او بربنډې جامې يې پر تن وي. د لوبغالي داخل او بهر شاوخوا يې د شرابو پر پير او پلور بنديز لګولی دی. دغه راز يې د همجنسبازانو پر شعار بنديز لګولی دی.
قطر د خپلو قيوداتو لپاره سخت قوانين هم ايښي. د جرمني فوټبال لوبډلې تياره چې د همجنسبازۍ نښې يې درلودې، قطر ته د پريښودو اجازه ورنکړه، څو هغوی مجبور شول، عمان هېواد ته لاړل او له هغې ځايه په بله تياره کې قطر ته د داخلېدو اجازه ورکړل شوه.
دوکره مصارف يې وکړل، تر څو د ما.ي ګټو سربېره معنوي ګټې هم ترلاسه کړي، ځکه چې بې پيسو هيڅ شی نه کيږي.
