کابل ټکی کام (جمعه، ۲ جدي، ۱۴۰۱ل)
د مصر د ستر اسلامي پوهنتون الازهر شیخ د اسلامي امارت پر مشرۍ د افغان سرپرست حکومت لخوا د ښځینه وو پر لوړو زدکړو د بندیز پر پرېکړه خواشیني ښوولې
په افغانستان کې دننه او له افغانستانه بهر اسلامي امارت وروستۍ پرېکړې ته غبرګونونو په لړ کې د مصر د الازهر پوهنتون “شیخ احمد الطیب” د اسلامي امارت له خوا د ښځینه وو پر لوړو زدکړو د بندیز پرېکړه باندې خواشیني ښودلې او هغه یې له اسلام سره په ټکر بللې ده.
دغه پوهنتون پر خپله فیسبوک پاڼه خپره کړې اوږده اعلامیه کې ویلي، دا پرېکړه چې د مسلمانانو ضمیرونو ته یې ټکان ور کړی، باید له هیڅ مسلمان څخه صادره شوې نه وای.
د الازهر پوهنتون شیخ د نړۍ مسلمانانو او نا مسلمانانو وګړو ته ویلي،دا ګومان ونه کړي چې له لوړو زدکړو څخه د نجونو راګرځول اسلامي لارښوونه ده، بلکې اسلام له دغه ډول کړنو څخه سخت انکار کړی دی.
په ورته مهال د هندوستان سترې دیني مدرسې دیوبند هم د اسلامي امارت پر پرېکړه نیوکې کړې دي او له افغان سرپرست حکومت یې غوښتنه کړې ده چې پر خپله پرېکړه دی له سره غور وکړي.