آمريکا کې سړې هوا او طوفاني واورې ۶۲ تنه مړه کړي دي
کابل ټکی کام (چهارشنبه، ۶ جدي، ۱۴۰۱ل)
د راپورونو له مخې ، د امریکا په متحده ايالاتو کې سړې هوا او طوفاني واورې ورېدو له امله لسګونه کسانو خپل ژوند بايللی دی.
ځايي رسنۍ ليکي، چې پرون دوشنبه يواځې د نیویارک په بوفالو ښار کې د سړې هوا له کبله ۲۸ تنه مړه شوي دي.
د نیویارک ایالت چارواکي وايي، ځینې کسان ان څه باندې دوې ورځې په ګاډو کې بند پاتې دي چې “احتمالاً” دا د دوی په ژوند کې تر ټولو ناوړه توپان دی.
په ورمانت، اوهایو، میسوري، ویسکانسین، کانزاس او کلوراډو ایالتونو کې هم یو شمېر خلک مړه شوي دي او په ټول هېواد کې بيا تر دې مهاله د ۶۲ تنو مړينه تائيد شوې ده.
د یخنۍ دغه څپې له کاناډا پیل او د امریکا د سویلي تګزاس ایالت پورې د لسګونه میلیونه خلکو ژوند له کړاو او بندښت سره مخ کړی دی، چې د چارواکو په وينا “د ښار ځینې برخې داسې دي لکه جګړې چې ځپلې وي، د سړکونو هرې خواته بې شمېره موټر بې حرکته ولاړ دي.”
تر ټولو ډيره یخني د امریکا مونتانا ایالت په لوېدیځه برخه کې ثبت شوې چې د هوا پېژندنې ځایې ادارو د معلوماتو له مخې د سانتي ګراد په کچه تر منفي ۴۵ راټېټه شوې ده.
د امریکا ولسمشر جو بایډن د بېړني حالت اعلان کړی دی.
