کابل ټکی کام (سه شنبه، ۱۸ سلواغه، ۱۴۰۱ل)
د افغانستان اسلامي امارت حکومت د کډوالو چارو وزارت وايي، چې په يوه تازه هڅه کې د پاکستان د سیند ایالت له زندان څخه ۴۰ تنه افغانان خوشې شوي دي.
یاد وزارت نن سې شنبه فبرورۍ اوومه (سلواغې ۱۸) ویلي چې په ازادو شوو افغان بندیانو کې څلور افغان کورنۍ هم شاملې دي.
خبرپاڼه کې راغلي، چې دغه افغانان په اسلام اباد کې د افغانستان سفارت او کډوالو اتشې په هڅو د سيند ايالت له زندانه خوشې شوي دي.
د کډوالو چارو وزارت زياتوي، تازه خوشې شوي افغانان به د سپین بولدک ـ چمن له لارې افغانستان ته ولېږدول شي.
د کډوالو وزارت وايي، چې د پاکستان د لندي او پچه زندانونو څخه د ۱۶۰ نورو افغان کډوالو خلاصولو هڅې هم روانې دي.
دا په داسې حال کې ده چې د طالبانو حکومت په دې وروستیو کې دپاکستان له زندانونو څخه د سلګونو افغانانو د خوشي کېد خبر ورکړی دی.
دغه افغانان چې اکثره یې د ناروغیو د علاج او خپلو دوستانو د لیدو لپاره پاکستان ته تللي و د هغه هیواد د پولیسو لخوا تر نیول کېد وروسته بندیان شوي دي.
