کابل ټکی کام (شنبه، ۲۰ کب، ۱۴۰۱ل)
د امریکا د بهرنیو چارو پخواني وزیر مایک پمپیو له افغانستانه د امریکايي ځواکونو د وتلو په اړه ویلي، واشنګټن د مېلیاردونو ډالرو په ارزښت پوځي وسلې په افغانستان کې پرېښودې چې دا یوه تېروتنه وه. پمپیو له فاکس نیوز سره په خبرو کې زیاته کړې، د جو بایډن له دې پرېکړې سره امریکا په ټوله نړۍ کې خپل ځواک وبایله. نوموړي زیاته کړې چې، د امریکا پخواني ولسمشر ډونالډ ټرمپ هم له افغانستانه د وتلو غوښتونکی و، خو په وینا یې دوی غوښتل چې د خپل هېواد د سرتېرو او هغو خدمتونو ته چې په افغانستان کې یې په دوو لسیزو کې تر سره کړي، درناوی وشي.
