کابل ټکی کام (چهارشنبه، ۲۴ حوت، ۱۴۰۱ل)
د راپورونو له مخې له تېرو ۲۴ ساعتونو راهیسې د پولیسو لخوا د پخواني لومړي وزیر عمران خان د نیولو عملیات پیل شوي؛ خو د سختو هڅو سره سره یې بیا هم په نیولو نه دي بریالي شوي.
د لاهور له زمان پارک راپورونه وایي، چې د عمران خان زرګونه پلویان سیمې ته رسیدلي، چې له امله یې د پولیسو عملیات له خنډ او ځنډ سره مخ شوي دي.
په ورته مهال له سیمې راپورونه وایي، چې یوځل پولیسو له چورلکې زمان پارک ته په ښکته کیدلو بریالي شوي؛ خو د عمران خان پلویان مقاومت کړی چې په پایله کې یې د ۴۰ امنیتي ځواکونو په ګډون لسګونه کسان ټپیان شوي دي.
عمران خان په تېرو ۲۴ ساعتونو کې د الجزیرې او سي این این په ګډون له ګڼو کورنیو او بهرنیو رسنیو سره د خبرو پر مهال پر پاکستاني ولس غږ کړی، چې که “زه ونیول شوم او یا ووژل شوم نو تاسو به کرار نه کینئ او د حقیقي آزادۍ لپاره به خپلې هڅې جاري ساتئ”.
