کابل ټکی کام (پنجشنبه، ۲۵ حوت، ۱۴۰۱ل)
د راپورونو له مخې ، د هند په اروناچل پردیش ایالت کې یوه پوځي چورلکه له رادار سره د اړيکې له پرې کېدو وروسته لوېدلې ده.
ځايي رسنۍ ليکي، چورلکې نن سهار په نهو بجو له سنګ کلي څخه الوتنه وکړه او د آسام په لور روانه شوه، چې له الوتنې لږ وروسته چورلکې د کنټرول له خونې سره اړیکه پرې شوه.
راپور زياتوي، په دې پېښه کې دوه پیلوټان وو چې وژل شوي دي.
ویل کېږي چې په چورلکه کې د پوځ یو لوړپوړی چارواکی هم له عملې سره وو، خو په دې اړه کره معلومات نشته.
د پېښې د علت معلومولو لپاره پلټنې پیل شوې دي.
