کابل ټکی کام (چهارشنبه، ۹ وری، ۱۴۰۱ل)
د متحدو ایالتونو دفاع وزیر وایي، چې ایران او له دې هېواد سره تړلو وسله والو په تېرو دوو کلونو کې ( د جوبایډن د واکمنۍ له پیل راهیسې) په سوریه او عراق کې ٨٣ ځلې امریکایي اهداف په نښه کړي دي.
د امریکا دفاع وزیر لویډ اسټین دغه راز ویلي چې امریکا هم د دوی پر اهدافو د ایران بریدونو ته ځواب ورکړی او د ایران سره پر تړلو وسله والو یې څلور ځلې عملیات کړي دي.
اسټین دا څرګندونې سې شنبه د وري اتمه د امریکا د استازو مجلس د وسله والو ځواکونو په کمیټه کې د جمهوري غوښتونکو د پوښتنو د ځوابونو په لړ کې مطرح کړې دي.
ویل کیږي جمهوري غوښتونکو سناتورانو د امریکا دفاع وزیر تورن کړی چې د ایران پرلپسې ګواښونو پر وړاندې یې کمزوری موقف اختیار کړی او جدي غبرګون یې نه دی ښودلی.
دا په داسې حال کې ده چې په سوریه کې د ایران او امریکا بریدونه ددې دواړو هېوادونو تر منځ د کړکېچ د زیاتېدو سبب شوي دي.
جمهوري غوښتونکي باور لري چې امریکایي پوځ د ایران پر وړاندې له محافظه کارانه چلنده کار اخیستی او کوم جدي غبرګون یې نه دی ښودلی.
د امریکا ولسمشر د ایران پر وړاندې د امریکا کمزوری موقف داسې توجیه کړی چې ګنې ” له ایران سره د جګړې په لټه کې نه دی” خو زیاته کړې یې ده چې د اړتیا په صورت کې له خپلو خلکو د دفاع په خاطر نور انتخابونه هم په اختیار کې لري.
