کابل ټکی کام (شنبه، ۲۰جوزا، ۱۴۰۲ل)
د افغانستان د خوړو او درملو د ملي ادارې مسوولانو پرون په کابل کې د یوې غونډې پر مهال وویل، په هېواد کې د بهرنیو شرکتونو د درملو د ثبت لپاره یوه نوې کړنلاره جوړه شوې ده. دغه اداره وايي، د یادې کړنلارې له مخې د درملو بهرني تولیدونکي شرکتونه مکلف دي چې په هېواد کې د هر قلم توکي د ثبت لپاره زر امریکایي ډالر دې ادارې ته ورکړی. ورته مهال، د دې ادارې د جواز ورکړې مسوول بیا وايي، هغه درمل چې په کور دننه تولیدېږي، له بهره یې د وارداتو بهیر درول شوی دی. د خوړو او درملو د ملي ادارې د مالوماتو له مخې، دمګړۍ افغاستان نږدې ۶۰۰ ډوله درمل تولیدوي او اوس د دې جوګه شوی چې ۱۵ ډوله یې بهر ته هم صادر کړي.
