(کابل ټکی کام، شنبه، ۲۰ جوزا، ۱۴۰۲ل)
د حزب اسلامي ګوند انجینر “ګلبدین حکمتیار” د بدخشان ولایت په مرکز فیض اباد ښار کي پر جومات برید په کلکو ټکو وغانده، دغه برید یې وحشیانه او تروریستي بللی او له هغو کسانو سره یې خپله خواخوږي شریکه کړه چي په دې پېښه کي یې خپل عزیزان او همکاران له لاسه ورکړي دي.
د حزب اسلامي مشر په خپله ټويټر پاڼه ليکلي چي د فيض اباد ښار په نبوي جومات کي ترهګريز عمليات او چاودنه په کلکه غندي.
نوموړي په دغه پيغام کي د دې پېښې له کورنيو او هغو کسانو سره هم خواخوږي څرګنده کړې چي په دې پېښه کي يې خپل عزيزان او ملګري له لاسه ورکړي دي.
درې ورځې وروسته له هغې چي د بدخشان لپاره د اسلامي امارت مرستیال په موټر بم چاودنه کي شهید شو؛ د پنجشنبې په ورځ د فیض آباد ښار په نبوي جومات کي چي اسلامي امارت چارواکي هم په کي وو؛ يوې بلې چاودنې د هغه د فاتحې مراسم په نښه کړل.
