کابل ټکی کام (دوشنبه، ۲۲ جوزا، ۱۴۰۲ل)
د ملګرو ملتونو امنيت شورا د تعزيراتو کمېټې د تحليل او څارنې ټيم ۱۴م راپور، چې د افغانستان د وضعيت، د افغانستان اسلامي امارت د غړو او پر نړيوالې سولې او امنيت يې د اغېزو په اړه يو اړخيز، غير متوازن او له واقعيته لرې راپور نشر کړی، موږ يې په اړه خپل دريځ په لاندې توګه وړاندې کوو: د افغانستان اسلامي امارت د ملگرو ملتونو د امنيت شورا د تعزيراتو دوام او دا ډول راپورونه يې له تعصبه ډک او د خپلواکۍ او عدم مداخلې اصولو سره په ټکر کې بولي او غوښتنه کوي، چې بايد د پاي ټکي ورته کېښودل شي. د افغانستان اسلامي امارت په ياد راپور کې منعکس شوي بېاساسه تورونه، چې د افغان حکومت د مشرانو ترمنځ اختلافات موجود دی، افغانستان د ترهگرو پر امن ځای بدل شوی، د مخدره توکو قاچاق د اسلامي امارت د چارواکو له لوري کېږي، د صلاحيتونو انحصار او په حکومت کي د ټولو قومونو نشتون او نور …. بې بنياده او د افغانستان له خپلواک ولس او نظام سره ښکاره دښمني او د تېرو شلو کلونو بې اساسه تبليغات بې ګټې او مغرضانه تکرار بولي.
د اسلامي امارت د مشرانو ترمنځ د اختلاف د شتون افواه په ځانګړې توګه د تېرو شلو کلونو د پروپاګند دوام بولو.
موږ د دغه راپور ارزونه، چې اسلامي امارت د ګاونډيو او سيمې هيوادونو له مخالفينو سره مرسته کوي يا د افغانستان خاوره د نورو هيوادونو خلاف استعمالوي، په کلکه ردوو د دې راپور له محتوي څخه ښکاري، چې يا خو يې ليکونکي معلوماتو ته لاسرسی نه لري، يا قصداً حقايق تحريفوي او يا يې هم د معلوماتو سرچينې د اسلامي امارت تښتېدلي مخالفين دي. د افغانستان اسلامي امارت ټينګار کوي، چې خپلو ژمنو ته متعهد دی او د دې ډاډ ورکوي، چې د افغانستان له خاورې ګاونډيو، سيمې او نړۍ هيوادونو ته هېڅ ډول ګواښ متوجه نه دی او افغانستان هېچا ته د دې اجازه نه ورکوي، چې خاوره يې د نورو خلاف استعمال شي. د يادولو ده، چې د اسلامي امارت شاوخوا ۲ کلونو واکمنۍ زموږ دغه ادعا ثابته کړې ده، چې په پايله کې يې د ګاونډيو او سيمې له مهمو هيوادونو سره د افغان حکومت اړيکې ورځ تر بلې پراخيږي او د مشترکو ګټو پر بنسټ يې ښه پرمختګ کړی دی. دا د دوه اړخيز اعتماد پايله ده. اسلامي امارت يادونه کوي، چې د نشهيي توکو کښت، توليد او قاچاق په بېساري ډول راښکته شوي او د نړيوالو رسنيو وروستي راپورونه د دې ښکاره ثبوت دی. اسلامي امارت ټينګار کوي، چې د امنيت شورا دا ډول يو اړخيز او غيرموثق راپورونو نشر نه يوازې دا چې د افغانستان او نړيوالې سولې او امنيت سره مرسته نه کوي؛ بلکې د خلکو اندېښنو د زياتېدو سبب ګرځي او د ملګرو ملتونو پر خپلواکۍ او بېپريتوب شکونه لا زياتوي او اعتبار ته يې هم صدمه رسوي. د افغانستان اسلامي امارت ټولې پريکړې د اسلامي شريعت د لارښوونو، دوو اړخيزو او څو اړخيزو تعهداتو او ملي ګټو په رڼا کې ترسره کېږي او چمتو دی چې له نړيوالي ټولنې سره ګډو اندېښنو ته د رسېدګۍ په موخه تعامل ته دوام ورکړي.
