عمران خان: د افغانستان په اړه د پاکستاني چارواکو خبرې له حقیقت څخه لرې دي
کابل ټکی کام (پنجشنبه، ۱۲ زمری، ۱۴۰۲ل)
د پاکستان پخواني لومړي وزیر “عمران خان” د افغانستان په تړاو د لومړي وزیر شهباز شریف او بلاول زرداري خبرو ته په غبرګون کې ویلي، چې دوی د امریکا په خوله خبرې کوي او څرګندونې یې حقیقت نه لري.
د عمران خان په خبره افغانستان له تېرو ۴۵ کلونو راهیسې د جګړې په اور کې سوځیږي او هیڅ امکان نلري چې افغانستان کې واکمن “طالبان” دې په پاکستان د بریدونو لپاره کومې وسله والې ډلې ته د خپلې خاورې د کارولو اجازه ورکړي.
د عمران خان په خبره ستونزې د پاکستان په دننه کې دي او حکومت ته ښایي چې د خپل بام واوري په نورو وا نه چوي.
نوموړی زیاتوي” شهباز شریف او بلال ول زرداري” د امریکا په خوله خبرې کوي خپل دریځ نلري او باید له پارونکو څرګندونو ډه ډه وکړي.
عمران خان زیاته کړې چې د ګوند سیاست یې د افغانستان په هکله مثبت دی: موږ په افغانستان کې سوله او له واکمنو طالبانو سره د ښو او مثبتو اړېکو غوښتونکي یو.
د ویلو ده چې عمران خان د پیغور په ډول بلاول زرداري ته ویلي چې په اوونۍ کې یوځل د خپل بادار ټاټوبي امریکا ته سفر کوي؛ خو خپل ګاونډي هیواد افغانستان ته یې تر اوسه یو سفر نه دی کړی ځکه چې بادار امریکا یې اجازه نه ورکوي.
