کابل ټکی کام (شنبه، ۲۱ زمری، ۱۴۰۲ل)
د افغانستان د اوبو او انرژۍ وزارت په پنجشیر ولایت کې د ۳۴ واټر شیډونو او چکډمونو د چارو د پيل خبر ورکړ.
ياد وزارت ويلي، چې په پنجشیر ولایت کې د ۳۴ واټر شیډونو او چکډمونو چارې د یو سلو یو اتیا زره او پنځه سوه دوه نوې (181592) آمریکایي ډالرو په ارزښت د پورتني پنجشیر- بازارک سیندیزې فرعي حوزې رئيس ښاغلي مولوي فضل الله عادل، په پنجشیر ولایت کې د ناروي کمېټې د مسؤل او یو شمېر سیمه ییزو مسؤلینو په شتون کې پيل شوې.
د اوبو او انرژۍ وزارت په خبرپاڼه کې راغلي، چې د يادو پروژو چارې د نوموړي ولایت په مرکز ، شتل، عنابه او رخه ولسوالیو کې د ناروي کمېټې په مالي ملاتړ د سیلابونو د مدیریت او د ځمکې لاندې اوبو سرچینو د مدیریت په موخه پلي کېږي.
