کابل ټکی کام (پنجشنبه، ۲۷ تله، ۱۴۰۲ل)
په داسې حال کې چې پر غزې تړانګې په دیارلسمه ورځ هم د نیواکګرو صهیونستانو خونړۍ بمبارۍ او په ځواب کې یې د حماس او نورو فلسطیني مقاومتي ډلو له لوري د اسراییلو د پلازمینې تل ابیب په ګډون په نورو یهودي مېشتو ښارونو توغندویي بریدونه دوام لري. د ترکیې ولسمشر “رجب طیب اردغان” د فلسطین او اسراییلو په جګړه کې د پوځي مداخلې ګواښ کړی دی.
ولسمشر اردوغان ویلي: زه په ټول بشریت غږ کوم چې د غزې په تړانګه کې د صهیونیست ریژیم لخوا د دې بې ساري وحشت د مخنیوي لپاره اقدام وکړي. “که نه، موږ به یې په خپله وکړو.
ولسمشر اردغان ډاډ ورکړی، چې په منځني ختیځ کې زرګونه سرتیري لري او که د صهیونیستانو جنایتونه دوام وکړي. موږ مجبور یو، چې له زور څخه د کار په اخیستلو سره ورته غاښ ماتونکی ځواب ووایو.
د ویلو ده چې د روانې اکتوبر میاشتې په اوومه نېټه حماس اسلامي غورځنګ د نورو فلسطیني ډلو په ملاتړ د “القصی طوفان” په نامه پراخ ځپونکي عملیات پیل کړل، چې په پایله کې زرګونو صهیونیستانو ته مرګ ژوبله واړوله او د لسګونو لوړ پوړو جنرالانو په ګډون یې سلګونه اسراییلي نیواکګر پوځیان ژوندي ونیول؛ خو صهیونیستي اشغالګرو یې په ځواب کې د غزې په تړانګه کې په بې دفاع ولسي وګړو هوایي بریدونه پیل کړل، چې تر دې دمه پکې ۳۳۰۰ فلسطنیان شهیدان شوي، ۱۱۰۰۰ نور ټپیان دي او د غزې ګڼې برخې ویجاړې شوې دي.
