کابل ټکی کام (جمعه، ۲۸ تله، ۱۴۰۲ل)
د پنجشنبې په ورځ «اکتوبر ۲۷» رویټرز خبري آژانس راپور ورکړی، چې په عراق کې د امریکايي ځواکونو په هوايي اډه «عین الاسد» او د یمن په سواحلو کې د امریکا پر یوې جنګي بېړۍ د راکټي او بې پیلوټه الوتکو بریدونه شوي دي.
د دغه راپور له مخې امریکایي پوځ ته نیږدې سرچینو اعلان کړی، چې د پنجشنبې په ماښام د عراق په لویدیځ کې د “عین الاسد” هوايي اډه چې امریکایي ځواکونه پکې شتون لري د بې پیلوټه الوتکو او توغندیو په وسیله په نښه شوه او د دغې اډې دننه د څو چاودنو غږونه اورېدل شوي دي.
په ورته وخت کې یوه بل امریکايي چارواکي رویټرز خبري اژانس ته ویلي، د امریکا د سمندري ځواکونو یوه جنګي بېړۍ چې د یمن سواحلو ته څېرمه روانه وه، درې توغندي پرې ویشتل شوي دي.
دغه امريکايي چارواکي چې نه يې غوښتل نوم يې واخيستل شي وويل چې امريکايي بېړۍ ته کوم زيان نه دى اوښتى او يو شمېر توغندي او بې پيلوټه الوتکې له منځه وړل شوي او جنګي بېړۍ ته څېرمه غورځېدلي دي.
د امریکا د دفاع وزارت «پنټاګون» په دې اړه ویلي: «موږ د حوثي وسله والو له یو شمېر بې پیلوټه الوتکو سره مخامخ شو چې یمن ته نږدې د یوې امریکايي کښتۍ پر لور وتوغول شول.»
هغه زياته کړه، چې د امريکا پر جنګي بېړۍ د حوثيانو په بريد کې چا ته زيان نه دى اوښتى.
د امریکا دفاع وزارت وایي: چې امریکايي ځواکونو د هغو بې پیلوټه الوتکو د بریدونو هم مقابله وکړه چې په عراق کې د عین الاسد هوايي اډې د په نښه کولو لپاره توغول شوي و.
په داسې حال کې چې د اسراییلو او حماس د جګړې په پایله کې سیمه کې تاوتریخوالی زیات شوی، امریکایي ځواکونه د ایران له ملاتړه د برخمنو ډلو د حملو له ګواښ سره مخ دي.
د چارشنبې په ورځ هم په عراق کې د امریکا پر دوه پوځي اډو د بې پیلوټه الوتکو بریدونه وشول،چې یو د یو شمیر سرتیرو د ټپي کیدو سبب شو.
د ویلو ده چې تېره اوونۍ عراقي وسله والې ډلې “الحشد الشعبي” چې ایران یې ملاتړ کوي ګواښ وکړ که امریکا په غزه کې د حماس پر ضد د اسرائیلو د ملاتړ لپاره مداخله وکړي، عراق، سوریه، او د منځني ختیځ په نورو برخو کې به امریکایي اهداف په نښه کړي.
