کابل ټکی کام (جمعه، ۱۲ لړم، ۱۴۰۲ل)
د فلسطیني حماس اسلامي غورځنګ د پوځي څانګې “القسام لېوا” ویاند ابوعبیده “الأقصی” تلویزیوني چینل سره په خبرو کې ویلي، چې مجاهدین یې په زړورتیا جګړه کوي او په تېرو ۴۸ ساعتونو کې یې د صهیونیستي اشغالګرو دوه پوځي کنډکونه له منځه وړي او اسراییلي نیواکګر اړ شوي چې د غزې له صلاح الدین سیمې وتښتي.
ابوعبیده زیاتوي: په تېرو ۴۸ ساعتونو کې یې د اسراییلو یوه جنګي بیړۍ، یوه چورلکه او ۵۰ زغروال ټانکونه له منځه وړي چې په پایله کې یې ۱۰۰ اسراییلي پوځیانو ته مرګ ژوبله اوښتې او ځینې نور یې ژوندي نیولي دي.
د القسام ویاند زیاتوي: چې ځواکونه یې له بېلا بېلو تکتیکونو کار اخلي چې تر ټولو مهم یې د “دوښمن” د لیکو شا ته ځانونه رسول، د اشغالګرو پوځیانو او د دوی د قوماندې د مرکزونو ترمنځ د اړېکو پرېکول دي.
د القسام ویاند صهیونیستي اشغالګرو ته خبرداری ورکړی، چې غزه به یې په ګور بدله شي. موږ هر وخت جګړې ته چمتو یو. د دوښمن د وژل شویو کسانو شمېر له هغه څو چنده لوړ دی، چې دوی یې مني. نتنیاهو د خپل ولس په سترګو کې خاورې اچوي.
