کابل ټکی کام (سه شنبه، ۲۳ لړم، ۱۴۰۲ل)
د فلسطیني حماس اسلامي غورځنګ د پوځي څانګې “القسام لېوا” ویاند ابو عبیده “الأقصی” تلویزیوني شبکې سره په خبرو کې ویلي، چې په تېرو ۲۴ ساعتونو کې یې د غزې په شمال کې د اسراییلي/ صهیونیست سازمان د پوځ د دوه مهمو قوماندانو په ګډون په سلګونو اشغالګر سرتېري وژلي دي.
د اسراییلو د پوځ رادیو هم د خپلو ځواکونو د یو بریدمن او د ځمکنیو عملیاتو د یو قوماندان د وژل کېدو او د څلورو نورو پوځیانو د ټپي کېدو پخلی کړی دی.
ابو عبیده د خپلو خبرو پر دوام ویلي: زموږ مجاهدین په ۳۸ مه ورځ هم د اشغالګرو صهیونیستي پوځیانو پر وړاندې په لوړو روحیاتو مقاومت کوي، د غزې تړانګې د شمال په ډېرو سیمو کې ورسره نښتې روانې دي. نوموړی زیاتوي: دا د اشغالګرو لپاره یواځې یو خوب دی، چې په غزه کې به زموږ مقاومت پای ته ورسوي.
ابو عبیده زیاتوي: د فلسطین مسئله یواځې موږ پورې اړه نلري بلکې دا د ټول اسلامي اُمت مسئله ده. تاریخ به هیڅکله هغه کسان ونه بښي چې د ملکي فلسطنیانو د قتل عام په مړو سترګو ننداره کوي او د الله تعالی په حضور کې به هم سر ټیټي ولاړ وي.په ورته وخت کې ایراني استخباراتو خبر ورکړی، چې زموږ د مالوماتو له مخې د اسراییلو پر وړاندې د حماس، اسلامي جهاد او نورو فلسطیني مقاومتي ډلو د جنګیالیو روحیه لوړه ده او اشغالګر ځواکونه له ډېرو هڅو وروسته هم غزې ته په ننوتلو نه دي بریالي شوي. د صهیونیستانو زور یواځې په بې دفاع فلسطنیانو بر ده. جګړه د غزې پولو کې روانه ده او اشغالګرو ته درانه ځاني او مالي زیانونه اوښتې دي.
