کابل ټکی کام (جمعه، ۲۶ لړم، ۱۴۰۲ل)
په داسې حال کې چې نن په ۴۱ مه ورځ هم پر غزې تړانګې د اسراییلي/ صهیونیست سازمان لخوا درنې بمبارۍ روانې دي او په غبرګون کې یې د حماس اسلامي غورځنګ او نورو مقاومتي ډلو له لوري هم د اسراییلو د پلازمینې تل أبیب په ګډون د دغه خود ساخته هیواد په ګڼو ښارونو توغندیز بریدونه او د غزې په شمالي سیمو کې خونړۍ نښتې روانې دي. تازه د حماس اسلامي غورځنګ د سیاسي دفتر مشر “دکتور اسماعیل هنیه” په خپلو تازه څرګندونو کې ویلي، چې هنیه: حماس غورځنګ د فلسطین په ولس کې ژورې ریښې لري او هیڅ څوک یې موجودیت له منځه نشي وړئ
هنیه چې وړمه شپه یې د مقاومت اړوند “الأقصی” تلویزیوني چینل سره خبرې کولې وویل: د دښمن ټول پلانونه ناکام دي دوی به هیڅکله خپلو اهدافو ته ونه رسيږي.
نوموړي ډاډ ورکړی، چې وحشي دښمن نشي کولای خپل اسیران له نظامي لاري آزاد کړي بلکې مجبور دي چې له موږ سره معامله وکړي او دا معامله به ورځ تر بلې سختیږي موږ د دوی د یو بندي په مقابل کې د خپلو لسګونو بندیانو د خوشې کولو غوښتونکي یو او په څرګند ډول مو خپل پیغام دوستو هیوادونو ته ورکړی دی. ترڅو یې صهیونیستانو ته ورسوي.
هنیه د خپلو خبرو پر دوام اشغالګر اسراییلي ځواکونه تورن کړي، چې د دوی له ځواکونو سره د مخامخ جګړې توان نلري. هره ورځ د وحشي دوښمن لسګونه ټانکونه له مینځه وړل کېږي. د صهیونستانو په وژل شویو سرتېرو د غزې لارې او کوڅې ډکې دي. او صهیونیستان د خپلو وژل شویو سرتېرو غچ له بې دفاع فلسطینیانو اخلي. دوښمن د جګړې له اوصولو سرغړونه کوي دوی په روغتونونو، ښونځیو، جوماتونو، مدرسو او کلیساګانو بریدونه کوي او د ولسي وګړو ټول وژنه یې پیل کړې ده. موږ یوځل بیا د ملګرو ملتونو په ګډون پر نړیوالې ټولنې، عربي هیوادونو او د جرمونو په نړیوالې محکمې غږ کوو چې د اسراییلو د کړنو مخنیوی وکړي.
د ویلو ده چې د حماس اسلامي مقاومتي غورځنګ په ۱۹۸۷م کال کې په غزه کې د شهید “شیخ احمد یاسین” په مشرۍ رامنځته شو، چې تر ټولو ستره موخه یې د “بیت المقدس” په ګډون د نورو اشغال شویو فلسطیني سیمو خپلواکي او د یو متحد فلسطیني دولت جوړول دي. دغه ګوند د ایډیالوژۍ له مخې اخوان المسلمین سره اړېکې لري او تر اوسه یې اسراییلو سره بې شمېره جګړې کړې دي چې تر ټولو ستره یې د تیرې اکتوبر میاشتې په اوومه د “طوفان الأقصی” په نوم بې ساري عملیات و، چې زرګونو صهیونیستي اشغالګرو ته پکې مرګ ژوبله واوښته او ګڼ شمېر نور یې د حماس لخوا ژوندي ونیول شول.
