کابل ټکی کام (سه شنبه، ۷ لیندۍ، ۱۴۰۲ل)
د راپورونو له مخې غزې تړانګې کې د حماس اسلامي غورځنګ د نظامي مسوول او لوړ پوړی غړی “یحیی سنوار” په موټریز کاروان د بې پیلوټه الوتکو لخوا برید شوی؛ خو حماس ته نږدې سرچینې وایي، چې نوموړی ترې روغ وتلی دی.
اسراییل نوموړی د “الأقصی طوفان” پلانونکی ګڼي او په سر یې ۶ میلیونه ډالر جایزه هم ایښي ده.
یحیی سنوار چې اسراییلو ته یو تر ټولو مطلوب کس ګڼل کېږي تر دې وړاندې هم پرې څو ځله مرګوني بریدونه شوي؛ خو زیان ورته نه دی رسیدلی.
حماس غورځنګ د یوې خبر پاڼې په خپرولو سره د اسراییلو برید له اوربند څخه ښکاره سرغړونه ګڼلی- د غچ اخیستلو ګواښ کړی او له منځګړو هیوادونو یې غوښتي، چې له اوربند څخه د اسراییلي اشغالګرو د بیا، بیا سرغړونو مخه دې ونیسي.
د ویلو ده، چې د حماس دغه لوړ پوړی مشر په ۱۹۷۸م کال کې اسراییلو نیولی او په ۳۳۰ کلونو بند محکوم کړی و؛ خو په ۲۰۱۱م کال کې د یو اسراییلي عسکر په بدل کې له زندان څخه خوشې شو.
