کابل ټکی کام (دوشنبه، ۱۳ لیندۍ، ۱۴۰۲ل)
د ملګرو ملتونو د سرمنشي ځانګړې استازې روزا اوتونبايوا د خوندي امنيت او مخدره موادو سره مبارزې په برخه کې د کورنيو چارو وزارت هڅې ستايلي او ويلي يي دي؛ په دې تړاو يې د بېلا بېلو هېوادنو له استازو سره کتلي او ټول په دې باور دي، چې له مخدره موادو سره د مبارزې، په مخدره توکو د روږدو کسانو درملنې په موخه دې په حرفوي زده کړو سربېره کروندګرو ته د بديل معيشت په برخه کې لازمې آسانتياوې رامنځته شي.نوموړې زياته کړې:له ګاونډيو هيوادونو څخه د افغان کډوالو راستنېدو ياد کډوال له ګڼو ستونزو سره مخ کړي، نوموړې د راستنېدونکو کډوالو د مديريت په برخه کې د اسلامي امارت له هڅو هرکلي کړي او په وينا يي، چې نړيواله ټولنه دغه بهير څاري. روزا اوتونبايوا ويلي؛ حاکم نظام تواندلی، چې له رامنځته کېدونکو پېښو سره بريالۍ مبارزه او د هغو ښه مديريت وکړي.د هغې په وينا: اسلامي امارت و کولای شول، چې په دغه بهير کې له نړيوالې ټولنې سره هم ښه تعامل ثابت کړي.د کورنيو چارو سرپرست خليفه سراج الدين حقاني ويلي: افغان حکومت بېرته راستنېدونکو کډوالو ته بېلابېلو برخو کې لازمې اسانتياوې رامنځته کړي او د چارو منظم ترسراوي په موخه يې د بېلابېلو ادراو له کار کوونکو څخه جوړو، مختلفو کمېټو ته دنده سپارلې، چې تر دې دمه يې د خدای تعالی په نصرت د يادو کډوالو لاسنيوي او خپلو مېنو ته د لېږد په برخه کې د پام وړ مرسته کړې او لاهم په بريالۍ توګه دوام لري.نوموړي زياته کړې؛ اسلامي امارت ته د افغانستان د امن او ثبات په څېر نړيواله سوله هم ځانګړي ارزښت لري او اسلامي امارت ګاونډيانو سره د رښتيني او صادقانه چلند په موخه لازم ګامونه اوچت کړي دي.ښاغلي حقاني ټينګار کړی، چې پخوانۍ ستونزې او نميګړتياوې بايد په اسلامي امارت پورې و نه تړل شي او دغه راز د ګاونډيو هيوادونو کورني مسايل بايد بهر کې مېشتو افغان کډوالو ته د ستونزو رامنځته کېدو لامل نه شي.سرپرست وزير زياته کړې: نړيوال اړخونه هم بايد د وسله والو جنايتکارانو د کنټرول په موخه د اسلامي امارت له هڅو ملاتړ وکړي.ښاغلي حقاني د نړيوالې ټولنې د سرمنشي له ځانګړې استازې څخه هيواد کې له مخدره توکو سره د مبارزې، راستنېدونکو افغان کډوالو سره د همکارۍ او په مخدره توکو د روږدو کسانو درملنې په موخه د نړيوالې ټولنې له همکارۍ مننه کړې.
